काठमाडौं । दिपक दीपाको बहु प्रतिक्षित फिल्म ‘छक्का पञ्जा ४’ यही फाल्गुण १९ गते शुक्रबार देखि नेपालको १२५ भन्दा धेरै स्क्रिन लगायत अमेरिका, यूरोप, अस्ट्रेलिया र मध्य पूर्वीय देशमा समेत प्रदर्शनमा आउने भएको छ ।
छक्का पञ्जाको यस अघिका सम्पूर्ण फिल्म सफल भएकोले निर्माण पक्ष छ्क्का पञ्जा ४ पनि दर्शकले रुचाउने र फिल्मलाई सफल बनाउनेमा ढुक्क देखिन्छ ।
दिपकराज गिरी, दीपा श्री निरौला, केदार घिमिरे, नीर शाह, बेनिषा हमाल, निर्मल शर्मा, बुद्धि तामाङ्ग, रमेश बुढाथोकी आदि कलाकारको प्रमुख भूमिका रहेको चलचित्र छक्का पञ्जा ४ को दुई गीत ‘दर्शन सलाम’ र ‘सिरुपाते जुङ्गैमा ‘हाल चर्चाको शिखरमा छन् ।
सामाजिक संजालमा यी दुई गीतमा छ्यापछ्याप्ती भिडियो बनाइएको देखिनुबाट पनि ती गीतको लोकप्रियताको साथै छक्का पञ्जा ४ को ट्रेलर रिलिज भएदेखी नै यूट्यूबको ट्रेन्डिङ्ग १ मा रहेको तथ्यबाट पनि छक्का पञ्जाको यो नयाँ सिरिज छक्का पञ्जा ४ प्रति दर्शकको निक्कै आकर्षण र व्यग्र प्रतीक्षा रहेको स्पष्ट हुन्छ ।
छक्का पञ्जा ४ बाट पुराना संचारकर्मी, चलचित्र लेखक र कलाकार सुशील देवकोटाले पनि एक प्रमुख भूमिकामा फेरि कम ब्याक गर्दैछन् । छ्क्का पञ्जा ४ ले पहिलाको छक्का पञ्जाको जस्तै व्यवसायिक सफलता प्राप्त गर्ला कि नगर्ला त्यो चाहिँ शुक्रबार फिल्म प्रदर्शन पछि नै थाहा हुनेछ ।
