काठमाडौँ । सातदोबाटो युथ क्लब केपी ओली कप राष्ट्रिय फुटबल प्रतियोगिताको फाइनलमा प्रवेश गरेको छ ।
ललितपुरको सातदोबाटोस्थित एन्फा कम्प्लेक्सको मैदानमा भएको पहिलो सेमिफाइनलमा सडन डेथमा विभागीय टोली त्रिभुवन आर्मी क्लबलाई हराउँदै सातदोबाटो उपाधिनजिक पुगेको हो ।
सोमबार भएको दोस्रो हाफ पनि गोलरहित बराबरीमा सकिएपछि खेल टाइब्रेकरमा पुगेको थियो । टाइब्रेकरमा पनि बराबरी भएपछि खेल सडन डेथमा पुगेको थियो ।
सातदोबाटोका गोलरक्षक अविशेक बराल खेलको प्लेयर अफ दि म्याच भए ।
आइतबार भएको पहिलो सेमिफाइनल गोलरहित बराबरीमा सकिएको थियो । पहिलो हाफ जारी रहँदा असिना पानी परेपछि दोस्रो हाफको केही मिनेटपछि खेल स्थगित भएर आजलाई सारिएको थियो ।
सातदोबाटोले अब उपाधिका लागि मछिन्द्र फुटबल क्लब र आयोजक केपी ओली फुटबल क्लबको विजेतासँग खेल्नेछ । दोस्रो सेमिफाइनल खेल आजै दिउँसो ३ बजेपछि सुरु हुनेछ ।
‘ए’ डिभिजन क्लबका ७ र एक आयोजक टोली केपी ओली एफसी गरी ८ टिमको सहभागिता रहेको प्रतियोगिताको विजेताले उपाधिसहित १० लाख नगद तथा उपविजेताले ५ लाख नगद प्राप्त गर्नेछ ।
यस्तै, प्रतियोगिताका सर्बोत्कृष्ट खेलाडीले १ लाख नगद पाउने छन् भने उत्कृष्ट गोलरक्षक, उत्कृष्ट गोलकर्ता र उदयमान खेलाडीलाई ५० हजार प्रदान गरिनेछ ।
