काठमाडौं । नेपाली कांग्रेसका प्रवक्ता प्रकाशशरण महतले सरकारले जनयुद्ध दिवसमा दिएको सार्वजनिक बिदा उपयुक्त नभएको बताएका छन् ।
कांग्रेस प्रवक्ता महतले सामाजिक संजालमा लेख्दै जनयुद्ध दिवस माओवादीले आफ्नै ढंगले मनाउनु छुट्टै कुरा हो तर राष्ट्रिय दिवसको रुपमा मनाउनु अस्वभाबिक रहेको बताएका छन् । उनले सरकारको हतारमा गरेको निर्णयले राष्ट्रिय दिवसको महत्वलाई हलुका बनाएको बताए ।
उनले भनेका छन्, ‘जनयुद्ध दिवस भनेर माओवादीले पार्टी तहमा आफ्नै ढंगले मनाउनु छुट्टै कुरा हो । राष्ट्रिय दिवसको रुपमा मान्यता दिनका लागि राष्ट्रिय जीवनका महत्वपूर्ण पक्षहरुबीच छलफल भई अधिकांश पक्षहरुले आत्मसात गरेको हुनुपर्दछ ।’
नेकपा माओवादी केन्द्रका अध्यक्ष पुष्पकमल दाहाल प्रचण्ड नेतृत्व सरकारले दिएको सार्वजनिक बिदाबारे चौतर्फि आलोचना भइरहेको छ । यसअघि कांग्रेसका महामन्त्री गगन थापा, मिनेन्द्र रिजाललगायत नेताहरुले पनि विरोध जनाइसकेका छन् ।
