काठमाडौँ । मुस्लिम इत्तेहाद संगठन नेपालले राष्ट्रियसभामा मुस्लिम समुदायको अनिवार्य प्रतिनिधित्व हुनुपर्ने माग गरेको छ ।
संगठनले नेपाली कांग्रेसका सभापति एवं पूर्वप्रधानमन्त्री शेरबहादुर देउवासमक्ष बुझाएको ज्ञापनपत्रमा वर्तमान निर्वाचन निर्देशिकाअनुसार परिभाषित ६ क्लस्टरमध्ये तुलनात्मकरुपमा बागमती, गण्डकी, कर्णाली र सुदूरपश्चिम प्रदेशमा मुस्लिम जनसंख्या कम रहेको भन्दै यी प्रदेशमा मुस्लिम समुदायलाई समेट्ने गरी निर्देशिका संशोधन हुनुपर्ने बताएको छ ।
संगठनले बुझाएको १० बुँदे ज्ञापनपत्रमा नेपाल हज समितिलाई अधिकार सम्पन्न बनाउन हज ऐन पारित गर्नुपर्ने, मुस्लिम समुदायको शिक्षा, स्वास्थ्य र रोजगारमा पहुँच बढाउनुपर्ने, अधिकारसम्पन्न मदरसा बोर्ड गठन गर्नुपर्ने लगायत माग राखिएको छ ।
