काठमाडौँ । नेकपा (एमाले) का अध्यक्ष केपी शर्मा ओलीले विभिन्न किसिमका अनुचित साँठगाँठहरुले राजनीति आक्रान्त भएको बताउनुभएको छ ।
प्रतिनिधिसभाको आइतबारको बैठकको विशेष समयमा उहाँले मुलुकले अस्थिरताको राजनीतिक व्यवहार निरन्तर बेहोरिरहनुपरेको भन्दै यस्ता अस्थिरता रोक्न सत्ता साझेदार दल एकमत भए पनि अनुचित साँठगाँठ बढिरहेको टिप्पणी गर्नुभयो ।
नेपालमा २००७ सालमा प्रजातन्त्र आएदेखि अहिलेसम्म कुनै पनि प्रधानमन्त्रीले ५ वर्षको पूर्णकाल सरकार चलाउन नपाएको उल्लेख गर्दै नयाँ संविधान बनेपछि त्यस्तो अवस्था अन्त्य होला भन्ने अपेक्षाविपरीत अहिले पनि उही अवस्था रहेको बताउनुभयो ।
उहाँले भन्नुभयो, “हामीले नयाँ संविधान जारी गर्यौँ तर स्थायित्व कस्तो भयो भने वर्षमा एक पटक प्रधानमन्त्री जस्तो भयो । हाम्रो चाहना स्थिरता र स्थायित्वको चाहना भयो तर हाम्रो प्राप्ति भने अस्थिरता र अनिश्चितता हुन पुग्यो । हाम्रो वर्तमान अनिश्चयता, डर र विभिन्न खालका अनुचित साँठगाँठहरूले आक्रान्त हुने गरेको छ ।”
अध्यक्ष ओलीले नेपाल र नेपाली जनताको भविष्य निर्माणका लागि राजनीतिक दलका नेताहरु मिलेर आत्मविश्वास र निडरताका साथ संकल्प गर्न आग्रह गर्नुभयो ।
