काठमाडौं । नेपाल क्रिकेट संघ (क्यान) का अध्यक्ष चतुर बहादुर चन्दले नेपाल टी–२० लिगमा सेभेन थ्री स्पोर्टसलाई विश्वास गरेर आफूहरूबाट त्रुटि भएको स्वीकारेका छन् ।
बिहीबार आयोजित पत्रकार सम्मेलनमा बोल्दै चन्दले क्यानले सेभेन थ्री स्टारलाई विश्वास गर्नु नै गलत भएको बताएका हुन् ।
चन्दले प्रतियोगिताका नेपाली खेलाडीहरुले ८० प्रतिशत पैसा पाईसकेको र अरु पनि पाउने क्रममा रहेको दाबी गरे । उनले नेपाली क्रिकेटमा ग्रहण लागेको र त्यसलाई सुधार्न सबैको सहयोग आवश्यक रहेको बताए ।
चन्दले स्पट फिक्सिङमा क्यानका कुनै पनि पदाधिकारीको संलग्न भए त्यसमा आफुहरु कारबाही भोग्न तयार रहेको बताए ।
चन्दले सेभेन थ्री स्पोर्ट्सले सम्झौता अनुसार काम नगरेर बीचमा धोका दिएको समेत बताए । क्यानले प्रतियोगिताका लागि ब्यवसायीक र रणनीतिक साझेदारको रुपमा सेभेन थ्री स्पोर्ट्ससँग ८ वर्षको सम्झौता गरेको थियो ।
नेपाल प्रहरीको केन्द्रीय अनुसन्धान ब्यूरो (सीआईबी) ले मंगलवार मात्रै नेपाल टी–२० लिगमा स्पट फिक्सिङ भएको बताएको थियो । फिक्सिङमा चार सहभागि टोलीको व्यवस्थापक र खेलाडिहरुसहित १० जनाको संलग्नता रहेका छन् । जसअन्तर्गत, पूर्व राष्ट्रिय खेलाडी महबुब आलम र राष्ट्रिय टोलीका सदस्य आदील अन्सारीलाई पक्राउ गरेर सीआईबीलेअनुसन्धान गरिरहेको छ ।
