काठमाडौँ । प्रधानमन्त्री पुष्पकमल दाहाल प्रचण्ड र उपप्रधानमन्त्री एवं गृहमन्त्री रवि लामिछाने यती एयरको जहाज पोखरामा भएको दुर्घटनाको वस्तुस्थिति बुझ्न त्रिभुवन अन्तर्राष्ट्रिय विमानस्थल पुग्नुभएको छ ।
आइतबार बिहान १० बजेर ३३ मिनेटमा काठमाडौँबाट पोखरा उडेको यती एयरलाइन्सको विमान ११ बजेर १० मिनेटमा पोखरास्थित सेती नदीको खोँचमा दुर्घटना भएको थियो ।
विमानमा चालक दलका चार सदस्यसहित ७२ जना सवार थिए ।
प्रधानमन्त्री प्रचण्ड र गृहमन्त्री लामिछानेले विमानस्थलमा रहेको उद्धार समन्वय केन्द्रमा पुगेर घटनाको विस्तृत विवरण लिनुभएको छ । प्रधानमन्त्री प्रचण्डले दुर्घटना हुनुको प्राविधिक र अन्य कारणबारे विमानस्थल र एटीसीका अधिकारीहरुसँग जानकारी लिनुभएको प्रधानमन्त्रीको सचिवालयले जनाएको छ ।
सचिवालयका अनुसार विमानस्थलका कर्मचारीहरुले प्रधानमन्त्रीलाई घटनाबारे जानकारी गराएका थिए । प्रधानमन्त्रीले प्रभावकारी रुपमा उद्धारमा लाग्न सबै निकायलाई निर्देशन दिनुभएको छ ।
दुर्घटना सम्बन्धमा अहिले १ बजे आकस्मिक मन्त्रिपरिषद्को बैठक बस्दैछ ।
