काठमाडौं । बुटवल बजारबाट करिब १० किलोमिटर टाढा पाल्पा जिल्लामा पर्ने नुवाकोट, बुटवलको उखरमाउलो गर्मी तथा मुटु नै कमाउने जाडो छल्ने सबैभन्दा नजिकको र सबैभन्दा उत्तम थलो हो भन्दा फरक नपर्ला ।
बुटवलको टन्टलापुरे गर्मीमा चिसो बतास मात्र नभई बाक्लो हस्सुमा रुमलिएको फुसफुसे पानी अनि महिनौँ घाम नदेख्दाको मुटु कमाउने जाडोमा पनि पारिलो घामले सेक्ने ठाउँ हो नुवाकोट ।
करिब १५० मिटर उचाइमा रहेको बुटवलको मौसम सारथिको रुपमा समुन्द्री सतहबाट करिब ९०० मिटरको उचाइमा रहेको नुवाकोट पुगेर बुटवल बजारको मनमोहक दृश्य देख्न सकिन्छ ।
बुटवलको शान्ति चोक (बेलबास र झोलुङ्गे पुलको बीच) बाट गाडी तथा बाइकमा करिब २५ मिनेटको उकालोमा सजिलै नुवाकोट पुग्न सकिन्छ । बाटो पूर्णरुपमा ग्राभेल गरिसकेकाले जुनसुकै मौसममा यहाँ जान सकिन्छ।
बास बस्न तथा खानको लागि प्रशस्त मात्रामा होटल रेस्टुरेन्टको व्यवस्था रहेको छ । माथि नुवाकोट पुग्न समय नहुनेहरु बुटवलबाट करिब दुई किलोमिटर माथि सम्ममात्र जाँदा पनि बुटवल भ्यु प्वाइन्ट पुग्न सकिन्छ र त्यहाँबाट बुटवलको पानारोमिक दृश्य देख्न सकिन्छ ।
यस यात्रामा बँदेलपोखरीको सेकुवा र नुवाकोटको लोकल परिकारहरु पनि छुटाउनै नहुने कुरा हुन् । बुटवलबाट उकालो लाग्नासाथ सम्पूर्ण यात्राभर बुटवलको फरक फरक रुप देख्न सकिने र छोटो समयमा यात्रा सम्पन्न गर्न सकिने हुनाले पनि यो बुटवल नजिकको उत्कृष्ट गन्तव्य हो ।
