हेटौँडा । बागमती प्रदेशसभाको सभामुख पदका लागि नेपाली कांग्रेसले उम्मेदवारी दर्ता गराएको छ । कांग्रेस प्रदेशसभा सदस्य शिवराज अधिकारीले सभामुख पदका लागि उम्मेदवारी दर्ता गराउनुभएको हो ।
अधिकारीको प्रस्तावकमा कुन्दनराज काफ्ले र समर्थकमा रामकृष्ण चित्रकार रहनुभएको छ । कांग्रेस प्रदेश संसदीय दलले समानुपातिकतर्फबाट निर्वाचित धादिङका अधिकारीलाई सभामुखमा उम्मेदवार बनाउन निर्णय गरेको थियो ।
सत्ता साझेदार दलबाट राष्ट्रिय प्रजातन्त्र पार्टी (राप्रपा)का भुवन पाठक उम्मेदवार बन्नुहुनेछ । सत्ता गठबन्धनबीच मुख्य पदहरु भागबन्डा गर्दा बागमती प्रदेशको सभामुख पद राप्रपाको भागमा परेको थियो । राप्रपाले पाठकलाई सभामुख पदको उम्मेदवार बनाउने निर्णय गरेको छ ।
सभामुख पदका लागि नेपाल मजदुर किसान पार्टी (नेमकिपा) की सृजना सायजुले पनि उम्मेदवारी दर्ता गरिसक्नुभएको छ ।
