काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले संसद्मा राप्रपा जनादेशबमोजिम राष्ट्रियता, राष्ट्रिय एकता, सुशासन र सेवा प्रवाहका आधारमा दृढताका साथ अगाडि बढ्ने बताउनुभएको छ ।
मंसिर ४ गते भएको प्रतिनिधिसभा सदस्य निर्वाचनपछि बसेको प्रतिनिधिसभाको पहिलो बैठकमा उहाँले हामी कसैले पनि म मात्र अगाडि बढ्छु भन्ने अवस्था नरहेको बताउनुभयो ।
जनताले कुनै एक राजनीतिक दलामाथि मात्र विश्वास गर्न नसकेको अहिलेको जनादेशले देखाएको भन्दै उहाँले एक्लै र एउटै विचारले नसक्ने भएकाले सबै राजनीतिक दल र विचारलाई मिलाएर जान सक्छौँ भन्ने जनादेश प्राप्त भएको उल्लेख गर्नुभयो ।
अध्यक्ष लिङ्देनले मुलुकको अर्थतन्त्र ओरालो लागेको, बेरोजगारी बढेको, मल र बीउको अभाव भएको र विकास निर्माण सुस्त तथा ठप्प भएको समस्याको चाङमा हामी आएको उल्लेख गर्नुभयो ।
उहाँले विचारभन्दा माथि देश रहेको र देशभन्दा माथि केही नरहेको उल्लेख गर्दै भन्नुभयो, “देशलाई शीरमा राखेर मुलकुका समस्यालाई सामूहिकरुपमा समाधान गर्न अग्रसर हुन सकौँ ।”
तस्बिरः रत्न श्रेष्ठ-रासस
