काठमाडौं । राजधानीमा जारी रहेको नेपाल टी–२० लिगमा लुम्बिनी अल स्टारले काठमाडौं नाईट्सलाई पराजित गरेको छ ।
किर्तिपूरको टियू मैदानमा भएको खेलमा लुम्बिनीले काठमाडौंलाई १ सय २ रनले पराजित गर्दै पहिलो क्वालिफायरमा पुगेको हो । पहिलो क्वालिफायर खेल आगामी आईतबार हुनेछ ।
लुम्बिनीले दिएको १ सय ८४ रनको लक्ष्य पाएको काठमाडौंले १५.४ ओभरमा अलआउट भएर ८१ रन बनायो । काठमाडौंका खेलाडी मैदानमा आउन ढिला गरे पछि खेल १७ ओभरमा छोट्याईएको थियो ।
काठमाडौंको तर्फबाट बसिर अहमदले २२ रन बनाए भने कमलसिंह ऐरी १६ रनमा आउट भए । यस्तै कप्तान ज्ञानेन्द्र मल्ल र लोकेश बमले भने समान १५/१५ रन बनाए ।
लुम्बिनीका लागि ह्यारी टेक्टर, कुशल भुर्तेल र इशान पाण्डेले २/२ विकेट लिए ।
पहिले ब्याटिङ गरेको लुम्बिनीले १७ ओभरमा ६ विकेट गुमाएर १ सय ८३ रन बनाएको थियो । लुम्बिनीका लागि हरमित सिंहले ३६ बलमा ७० रनको अर्धहतकीय ईनिङ खेलेका थिए । यस्तै लाहिरु मिलान्थाले २९ बलमा २६ रन बनाए। गुलसन झाले २१ रन बनाए भने ह्यारी टेक्टर १७ रन जोडे । अनिल शाह १६ तथा कुशल भुर्तेलले १५ रन बनाए ।
काठमाडौंका लागि अभिनास बोहोराले ३ विकेट लिए भने बसिर अहमदले २ विकेट लिए ।
नौ खेलमा सात जित हात पारेको लुम्बिनी १६ अंक सहित अंक तालिकाको शीर्ष स्थानमा रहेको छ भने आठ खेलमा ४ जितर ४ हार हात पारेको काठमाडौं अंक तालिकाको तेस्रो स्थानमा रहेको छ।
यस लिगमा ६ टोलीको सहभागिता रहेको छ ।जसमा काठमाडौं नाइट,पोखरा एभेन्जर्स,फार वेस्ट युनाईटेड,जनकपुर रोयल्स,विराटनगर सुपर किंग्स र लुम्बिनी अल स्टार रहेका छन् ।
