काठमाडौँ । सुनसरी निर्वाचन क्षेत्र नं ४ को प्रतिनिधिसभा सदस्य निर्वाचनमा नेपाली कांग्रेसका उम्मेदवार ज्ञानेन्द्रबहादुर कार्कीले ८८ मतले मात्र अग्रता गर्नुभएको छ । प्राप्त पछिल्लो मतगणनाअनुसार उहाँले २७ हजार ३६७ मत प्राप्त गर्नुभएको छ ।
उहाँका निकटतम प्रतिद्वन्द्वी जगदीशप्रसाद कुसियैतले २७ हजार २७९ मत पाउनुभएको छ । मतगणना जारी छ । अहिले एमालेको पकड क्षेत्रमा भएको मतदानको मतगणना भइरहेको बताइएको छ ।
सुनसरी–४ मा निर्वाचनमा खटिएका कर्मचारीले नेकपा एमालेमा ६ सय ६ मत थपेपछि मतगणना स्थगित भएको थियो । तर सुनसरी–४ का मुख्य निर्वाचन अधिकृत अर्जुन अधिकारीले कर्मचारीको गल्तीले एमालेमा थपिएको ६ सय ६ मत हटाइएकोले कुनै विवाद नरहेको बताउनुभएको थियो ।
लोकतान्त्रिक–वाम गठबन्धनका तर्फबाट नेपाली काङ्ग्रेसका केन्द्रिय सदस्य तथा सञ्चार तथा सूचना प्रविधि एवं कानूनमन्त्री कार्कीले मतगणना स्थगित भएपछि पुनः मतगणनाको माग गर्नुहुँदै निर्वाचन आयोगमा उजुरी दिनुभएको थियो ।
शुक्रबार साँझ निर्वाचन आयोगले पुनः मतगणना नगरी यथास्थितिमा मतगणना सुचारु गर्न निर्देशन दिएपछि मतगणना सुरु भएको थियो ।
