काठमाडौँ । कतारमा जारी फिफा विश्वकप फुटबल अन्तर्गत सेनेगल समूह ए को उपविजेता बन्दै नकआउट चरणमा प्रवेश गरेको छ ।
खलिफा रंगशालामा मंगलबार समूहको अन्तिम तथा निर्णायक खेलमा इक्वेडरलाई २–१ ले पराजित गर्दै सेनेगलले अन्तिम १६ मा स्थान पक्का गरेको हो ।
इस्माएला सारले खेलको ४४ औं मिनेटमा पेनाल्टीमा गोल गर्दै सेनेगललाई अग्रता दिलाएका थिए । दोस्रो हाफको ६८ औं मिनेटमा इक्वेडरका मोइसेस काइसेडोले गोल गर्दै खेललाई बराबरीमा ल्याए ।
७० औं मिनेटम कालिडोउ कौलीबालीले गोल गर्दै सेनेगललाई २–१ को अग्रता दिलाए । त्यसपछि थप गोल हुन सकेन र सेनेगल विजयी बन्यो ।
यस समूहबाट अपराजित रहँदै नेदरल्यान्ड्स समूह विजेताको बन्दै नकआउट चरणमा प्रवेश गर्यो । उसले ३ खेलमा ७ अंक जोड्यो । सेनेगल ३ खेलमा २ जितसहित ६ अंक जोड्दै समूहको दोस्रो स्थानमा रह्यो । इक्वेडर ४ अंकसहित तेस्रो स्थानमा रहँदा आयोजक कतार भने अंकबिहिन बन्दै पुछारमा रह्यो ।
