काठमाडौं । मंसिर ४ गते देशभर एकसाथ हुने प्रतिनिधिसभा र प्रदेशसभाको निर्वाचनको तयारी हुँदैछ । तर, मतदाता भने रोजगारीको खोजीमा देश छोडेर विदेशिन वाध्य छन् । झन वैदेशिक रोजगारीमा जानेको संख्या दिन प्रति दिन बढ्दै गईरहेको छ ।
गत असोज महिनामा मात्र वैदेशिक रोजगारीमा जान ६२ हजार ७०६ जनाले श्रम स्वीकृति लिएको वैदेशिक रोजगार विभागले जनाएको छ । श्रम स्वीकृति लिनेमध्ये ५७ हजार २९६ जना पुरुष र ५ हजार ४१० जना महिला रहेका छन् ।
असोज महिनामा सबैभन्दा बढी मलेसिया जान श्रम स्वीकृति लिएका छन् । विभागको अनुसार मलेसिया जान असोजमा २७ हजार ६२ जनाले श्रम स्वीकृति लिएका छन् ।
यस्तै युनाइटेड अरब इमिरेट्स जान ७ हजार ८४५, साउदी अरेबिया जान ६ हजार ५३६, कतार जान ९ हजार ८४५, दक्षिण कोरिया जान १ हजार ९१८, रोमानिया जान १ हजार १८०, माल्टा जान १ हजार १२ र कुवेत जान ३ हजार ४९७ जनाले श्रम स्वीकृति लिएका छन् ।
वैदेशिक रोजगार विभागको आुसार आर्थिक वर्ष २०७९र८० पछि वैदेशिक रोजगारीमा जानेहरुमा साउनमा ३८ हजार २००, भदौमा ७६ हजार ४०३ र ६२ हजार ७०६ गरी कुल १ लाख ७७ हजार ३०९ जनाले श्रम स्वीकृति लिएका छन् ।
