काठमाडौं । जसपाको आधिकारिकता गुमाएका महन्थ ठाकुरले पार्टी अध्यक्ष उपेन्द्र यादवको आलोचना गर्दै एक अपिल जारि गरेका छन् । बुधबार सोही पार्टीको अध्यक्षकै हैसियतमा जारी अपीलमा ठाकुरले केपी ओली नेतृत्वको तत्कालीन सरकारमा मधेसको माग पुरा हुने देखेर आफूहरु सहभागी भएको जिकिर गरेका हुन् ।
यादवले १८ महिना सरकारमा रहँदा पनि मधेसको मागप्रति सिन्को भाँच्न नसकेको ठाकुरले दावि गरेका छन् । उनले १८ दिनमै आफूहरुले मधेसका कयौं माग मुद्दाहरु पुरा गराएको दावी गरेका हुन् ।
पार्टीको आधिकारिकता दिएको प्रति असन्तुष्टि पोख्दै उनले यस विषयमा सर्वोच्च अदालतमा मुद्दा रहेकाले उपयुक्त निकास निस्कने विश्वास लिएका छन् ।
यस्तै मधेसी आदिवासी, जनजाति, थारुलगायतका जनताको अधिकार प्राप्ति गर्ने सवालमा एकल जातीय राज्यको समाप्ति तथा बहुल राष्ट्रिय राज्यको स्थापनाको निम्ति आफूहरु संघर्षरत रहेको भन्दै उनले त्यसका लागि सहयोग गर्न अपील गरेका छन् ।
