काठमाडौँ । सर्वोच्च अदालतले विश्व कप फुटबल प्रसारणको नाममा ग्राहकबाट थप पाँच सय रुपैयाँ लिने शुल्क कार्यान्वयन नगर्न अल्पकालीन अन्तरिम आदेश दिएको छ ।
प्रकाशमान सिंह राउतको एकल इजलासले विश्व कपका नाममा थप पाँच सय रुपैयाँ लिँदा ग्राहकमाथि अपूरणीय क्षति हुनसक्ने भन्दै अतिरिक्त शुल्क लिने निर्णय यथास्थितिमा राख्न आदेश दिएको हो ।
अधिवक्ता किशोर पौडेल र अनुपम भट्टराईले केही निजी कम्पनी र सरकारको साँठगाँठमा उपभोक्ता अधिकार विपरीत अतिरिक्त पाँच सय रुपैयाँ असुल्ने निर्णय भएको भन्दै उपभोक्ताहरूको तर्फबाट रिट दायर गरेका थिए ।
यस्तै, सर्वोच्चले कात्तिक २७ गते छलफल गर्न दुवै पक्षलाई बोलाएको छ ।
रिट निवेदकले सञ्चार मन्त्रालयसहित विश्व कपको प्रत्यक्ष प्रसारणको अनुमति लिएको मिडिया होम तथा टेलिभिजन सेवा प्रदायकसमेतलाई विपक्षी बनाएका छन् ।
मङ्सिर ४ गतेदेखि कतारमा विश्वकप सुरु हुँदैछ । विश्वका ३२ राष्ट्रले उक्त महाकुम्भमा सहभागिता जनाउँदैछन् ।
