एजेन्सी । आइसीसी टी–२० पुरुष विश्वकप अन्तर्गत भारतले जिम्बावेविरुद्ध सानदार जित निकालेको छ ।
आइतबार मेलबर्न क्रिकेट ग्राउन्डमा भएको खेलमा भारतले जिम्बावेलाई ७१ रनले पराजित गरेको हो ।
भारतले दिएको १८७ रनको विजयी लक्ष्य पछ्याएको जिम्बावेले १७.२ ओभरमा अलआउट हुँदै ११५ रनमात्र बनायो । जिम्बावेका लागि शिकन्दर राजाले २४ बलमा ३४ रन, र्यान बर्लले २२ बलमा ३५ रन बनाए ।
भारतका लागि रविचन्द्र अश्विनले ३ तथा हार्दिक पाण्ड्या र मोहम्मद शामीले २–२ विकेट लिए भने भुवनेश्वर कुमार, अर्शदीप सिंह र अक्षर पटेलले एक–एक विकेट लिए ।
त्यसअघि टस जितेर पहिले ब्याटिङ थालेको भारतले २० ओभरमा ५ विकेटको क्षतिमा १८६ रन जोड्यो । भारतका लागि सुर्यकुमार यादवले २५ बलमा ६१ रनको अर्धशतकीय इनिङ्स खेले । उनले ६ चौका र ४ छक्का प्रहार गरे ।
यस्तै, के एल राहुलले ३५ बलमा ५१ रनको अर्धशतकीय इनिङ्स खेले । उनले ३ चौका र ३ छक्का प्रहार गरे । रोहित शर्माले १३ बलमा १५, विराट कोहलीले २५ बलमा २६ तथा हार्दिक पाण्ड्याले १८ बलमा १८ रन बनाए ।
जिम्बावेका सिन विलियम्सले २ तथा शिकन्दर राजा, रिचर्ड एन्गरवा र ब्लेसिङ मुजारावानीले एक–एक विकेट लिए । अब बुधबार हुने पहिलो सेमिफाइनलमा ग्रुप–१ विजेता न्युजिल्यान्डले पाकिस्तानको सामना गर्नेछ । बिहीबार हुने अर्को सेमिफाइनलमा भारत र इंग्ल्यान्ड भिड्नेछन् ।
