बुटवल । नेकपा (एमाले) का उपाध्यक्ष विष्णु पौडेलले तिनाउ–दानव करिडोरको काम अगाडि बढाउन स्थानीयवासीको व्यवस्थापन पहिलो शर्त भएको बताउनुभएको छ । करिडोर निर्माण गर्दा नदी आसपासका बासिन्दा घरबारविहीन हुने भ्रम छरिएको उल्लेख गर्दै उहाँले स्थानीयबासिन्दाको व्यवस्थापनलाई पहिलो प्राथमिकता दिइने बताउनुभयो ।
सोमबार बुटवल–११ युद्धनगरमा पार्टी कार्यकर्ताहरुसँगको भेटघाटमा उहाँले पूर्वाधार विकास योजनका काममा जनतालाई भ्रममा पारेर राजनीति गर्न खोजिएको आरोप लगाउनुभयो । राजनीतिक स्वार्थपूतिका निम्ति जनतालाई आतंकित पार्ने काम गलत भएको उहाँको भनाइ थियो ।
पूर्वअर्थमन्त्री समेत रहेका पौडेलले तिनाउ नदी कटान रोकथाम तथा सुरक्षित बसोबासका लागि कोरिडोर निर्माणको काम अघि बढाइएको स्पष्ट पार्नुभयो । उहाँले यसबाट कोही जनतालाई पनि घरबासविहीन नबनाइने उल्लेख गर्नुभयो ।
