काठमाडौँ । त्रिभुवन अन्तर्राष्ट्रिय विमानस्थलले नेपाल वायुसेवा निगमको भारतको नयाँ दिल्ली उडानमा रोक लगाएको छ । दुई सय ५४ जना यात्रु लिएर भारतको नयाँदिल्ली उड्न लागेको नेपाल वायुसेवा निगमको वाइडबडीको आरए–२१७ उडान विमानस्थलले रोकिदिएको हो ।
अनुमति नलिई यात्रु बोर्डिङ गरेकाले निगमको उडान रोक्नुपरेको विमानस्थलले बताएको छ ।
नागरिक उड्डयन प्राधिकरणले जाडो यामका लागि स्वीकृत गर्ने अन्तर्राष्ट्रिय उडानहरूको तालिका (अक्टोबर ३० देखि मार्च २७ सम्म) मा निगमको आइतबार र शुक्रबार दिउँसो पौने २ बजे दिल्लीका लागि काठमाडौंबाट हुने उडान कटौती गरेकाले आइतबारको उडान रोकिएको विमानस्थलका महाप्रबन्धक प्रेमनाथ ठाकुरले जानकारी दिए ।
प्राधिकरणले आजदेखि सुरु हुने पाँच महिनाको विन्टर सेड्युलमा आइतबार र शुक्रबारको उडान कटौती गरिदिएको छ ।
