काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले आसन्न निर्वाचनमा माओवादीलाई कमजोर बनाउन नहुने बताउनुभएको छ ।
माओवादी कमजोर भए अहिलेसम्म प्राप्त उपलब्धि गुम्न सक्ने भन्दै उहाँले आगामी मंसिर ४ गते हुने प्रतिनिधिसभा र प्रदेशसभा सदस्य निर्वाचनलाई सामान्य निर्वाचन मान्न नसकिने बताउनुभयो ।
ललितपुरमा बुधबार प्रेस सेन्टरसँग कुराकानी गर्दै उहाँले भन्नुभयो, “हाम्रा लागि मंसिर ४ गतेको निर्वाचन सामान्य निर्वाचन होइन, अहिलेसम्म प्राप्त उपलब्धि रक्षा गर्ने जीवन मरणको संघर्षको रुपमा निर्वाचनलाई लिनुपर्छ, यसलाई उपलब्धि रक्षा गर्ने र उल्ट्याउन खोज्नेबीचको संघर्षका रुपमा लिनुपर्छ ।”
अध्यक्ष प्रचण्डले अहिलेसम्म प्राप्त उपलब्धि संघीयता, गणतन्त्र र धर्मनिरपेक्षतासहितलाई रक्षा गर्ने तथा उपलब्धि र परिवर्तन उल्ट्याउन खोज्नेबीच अहिलेको निर्वाचन भएको उहाँको भनाइ थियो ।
माओवादी बलियो हुँदा परिवर्तन र उपलब्धिको रक्षा हुने भएकाले आसन्न निर्वाचनलाई सामान्य निर्वाचनका रुपमा लिन नहुने उहाँले बताउनुभयो ।
