बेनी । म्याग्दी र कालीगण्डकी नदीको दोभानमा रहेको म्याग्दी सदरमुकाम बेनी बजार उत्सवमय बनेको छ । नवौँ राष्ट्रिय खेलकुद प्रतियोगिताअन्तर्गत बिहीबारदेखि बेनीमा सुरु भएको राष्ट्रिय महिला भलिबल प्रतियोगितालाई स्थानीय आयोजक र समुदायले ‘खेल उत्सव’को रूपमा सञ्चालन गरेका छन् ।
प्रतियोगिताको हरेक खेललगत्तै म्याग्दीको संस्कृति झल्कने सांस्कृतिक र साङ्गीतिक प्रस्तुति राख्ने गरिएको जिल्ला खेलकुद विकास समितिले जनाएको छ । राष्ट्रिय खेलकुद परिषद्ले तय गरेको कार्यतालिकालाई असर नपर्ने गरी प्रतियोगितामा सहभागिता जनाउन आएका खेलाडी, अफिसियल, व्यवस्थापक र खेलप्रेमी दर्शकलाई मनोरञ्जनका लागि नृत्य र साङ्गीतिक प्रस्तुति राख्ने व्यवस्था मिलाइएको जिल्ला भलिबल सङ्घका अध्यक्ष तेजेन्द्र बानियाँले जानकारी दिनुभयो ।
“यो प्रतियोगितालाई हामीले खेलउत्सवकै रूपमा सम्पन्न गर्ने प्रयत्न गरेका छौँ, हरेक खेलको बीच र अन्त्यमा खेलाडीलाई म्याग्दीको संस्कृति झल्कने सांस्कृतिक प्रस्तुति राख्ने हाम्रो जमर्को छ, पहिलो दिनको झाँकीसहितको सांस्कृतिक प्रस्तुतिले खेलाडी र खेल अवलोकन गर्न आएका दर्शक हर्षित भएको पाएका छौँ”, उहाँले भन्नुभयो । खेल अवधिमा म्याग्दीको थाली नाच, जातजातिको मौलिक कला संस्कृति झल्कने नृत्यसँगै विभिन्न सामूहिक नृत्यलाई समावेश गर्ने तयारी गरिएको जिल्ला खेलकुद विकास समितिले जनाएको छ ।
जिल्लामा रहेका जातजाति र सङ्घसंस्थाको पहिचान, कला र संस्कृति झल्कने झाँकी प्रदर्शनसहित खेलाडीलाई स्वागत गरेको म्याग्दीले राष्ट्रिय महिला भलिबल प्रतियोगितालाई महोत्सवका रूपमा सम्पन्न गर्ने लक्ष्य छ । बिहीबार उद्घाटनका अवसरमा ‘बेनीको बजार जता माया उतै छ नजर’ बोलको गीतमा सामूहिक नृत्य प्रस्तुत गरी स्वागत गरिएको कार्यक्रममा नौमती बाजा, नेवार समुदायको नागा–नागिनी नाच, मगर समुदायको पुख्र्यौली नाचसँगै युवायुवतीले लोकदोहोरी भाकाका गीतमा आकर्षक नृत्य प्रस्तुत गरिएको थियो ।
महिला भलिबल प्रतियोगिताको अवसरमा बेनीलाई तुल, ब्यानर र तोरनले सिङ्गारिएको छ । प्रतियोगिता अवधिमा खेलाडीलाई बेनी नजिकका पर्यटकीय गन्तव्यमा भ्रमणको समेत बन्दोबस्त मिलाइएको छ । आगामी कात्तिक २ गतेसम्म सञ्चालन हुने प्रतियोगितामा सात प्रदेश र तीनवटा विभागीय टिम सहभागी छन् । प्रतियोगिताको आज दोस्रो दिन पहिलो चरणको तीनवटा खेल सञ्चालन हुने जिल्ला खेलकुद विकास समितिका अध्यक्ष दिनेश केसीले जानकारी दिनुभयो । लिक कम नकआउट सिस्टममा खेलाइने प्रतियोगिताका लागि चारवटा समूह बनाइएको छ । पाँच दिनमा १६ खेल सञ्चालन हुनेछन् ।
