काठमाडौँ । नेकपा (एमाले) का उपाध्यक्ष विष्णु पौडेलले रुपन्देही जिल्लालाई विकास दृष्टिले मुलुककै नमूना जिल्ला बनाउने बताउनुभएको छ ।
आगामी मंसिर ४ गते हुने प्रतिनिधिसभा सदस्य निर्वाचनको प्रत्यक्षतर्फ रुपन्देही निर्वाचन क्षेत्र नं २ बाट उम्मेदवारी दिनुभएका पौडेलले भौतिक विकास, मानवीय विकास, शिक्षा, स्वास्थ्य र रोजगारीका दृष्टिकोणले रुपन्देही जिल्लालाई देशको नमूना जिल्ला बनाउन सकिने बताउनुभयो ।
चुनाव प्रचार प्रसारका क्रममा बुटवलमा आयोजित समारोहमा उहाँले देशका अरु भागबाट विकास सिक्नका लागि रुपन्देही जानुपर्छ, बुटवल जानुपर्छ र निर्वाचन क्षेत्र नं २ मा जानुपर्छ भन्ने परिस्थिति निर्माण गर्ने हिसाबले काम गर्ने बताउनुभयो ।
उपाध्यक्ष पौडेलले यही आत्मविश्वास, यही संकल्प र यही योजना बोकेर घरघरमा जनताका माझमा जाने र जनतासँग आफ्ना प्रस्ताव र अनुरोधहरु राख्ने बताउनुभयो । यसक्रममा उहाँले जनताका सुझाव र आलोचना पनि सुन्ने उल्लेख गर्नुभयो ।
