एजेन्सी । इंग्लिस प्रिमियर लिगको जारी सिजनमा उत्कृष्ट लयमा रहेको आर्सनलले लिभरपुलमाथि रोमाञ्चक जित निकालेको छ ।
आइतबार राति भएको खेलमा आर्सनलले घरेलु मैदान इमिरेट्समा लिभरपुललाई ३–२ गोलले पराजित गरेको हो । आर्सनलका लागि बुकायो साकाले दुई तथा गाब्रियल मार्टिनेलीले एक गोल गरे । लिभरपुलका लागि डार्विन न्युनेज र रोबर्टो फिर्मिनोले एक–एक गोल फर्काए ।
खेलको सुरुवाती पहिलो मिनेटमा नै मार्टिनेलीको गोलबाट आर्सनलले अग्रता बनाएको थियो । ३४ औं मिनटेमा न्युनेजले गोल गर्दै लिभरपुललाई १–१ को बराबरीमा ल्याए ।
पहिलो हाफको इन्जुरी समयमा साकाले गोल गर्दै आर्सनललाई २–१ ले अघि बढाए । तर, ५३ औं मिनेटमा फिर्मिनोले गोल गर्दै लिभरपुललाई २–२ को स्थितीमा लगे । यता, ७६ औं मिनेटमा आर्सनलले पेनाल्टी पायो । त्यस अवसरलाई साकाले खेर जान दिएनन् र आर्सनललाई जित दिलाए ।
जितसँगै ९ खेलबाट २४ अंकसहित आर्सनल अंकतालिकाको शीर्षस्थानमा यथावत छ । लिभरपुल ८ खेलबाट १० अंकसहित १० औँ स्थानमा छ ।
