तनहुँ । गाउँका खुला चउर, भञ्ज्याङ, डहर, घरका आँगनमा पिङ राखेपछि नेपालीको महान पर्व बडादशैँ आएको सङ्केत जनाउँछ । दशैँका लागि गाउँका बारीका कान्लामा बाबियो संरक्षण गरेर राखिन्थ्यो ।
विजयादशमीको टीकाको दिन एकपल्ट भए पनि शरीरले जमिन छाड्नुपर्ने प्रचलनअनुरूप हरेक नेपालीले पिङ खेल्ने गरेको भए पनि यो प्रचलन हराउँदै जान थालेको छ ।
नेपाली संस्कृतिको उदाहरणका रूपमा समेत लिइने पिङ विगत वर्षमा हरेक टोल र गाउँ–गाउँमा हालिने गरेकामा यस वर्ष केही स्थानमा मात्रै सीमित रहेको छ ।
तर, यसपटक तनहुँको भिमाद नगरपालिका-३ जलौदीमा भने फरक माहोल छ । यहाँ पहिलोपटक रोटे पिङ हालेपछि गाउँको शोभा नै बढेर गएको छ । युवापुस्ताहरुको अथाह लगाव र पाकाहरुको मेहनतले १२ दिन लगाएर पहिलोपटक रोटे पिङ हालिएको हो ।
केहीदिन पहिलेमात्र सडकबत्ती राखेपछि झलल बलेको जलौदी पिङ राखेपछि यसले हराउँदै गएको संस्कृती र परम्परालाई उजागर गरेको यहाँका वडाध्यक्ष पदमराज सेन बताउँछन् ।
यस पिङले समाजमा आपसी सहयोग र सद्भावलाई जोड्दै आउने पुस्तालाई समेत आफ्नो संस्कृती र पहिचानलाई जोगाइराख्न चुनौति समेत थपेको छ ।
