एजेन्सी । बलिउड अभिनेता आयुष्मान खुरानाले आफ्नो पारिश्रमिक घटाउने निर्णय गरेका छन् । आजकाल आयुष्मानका फिल्मले बक्स अफिसमा खासै कमाई गर्न सकेका छैनन् ।
जसका कारण उनले आफ्नो शुल्कमा १० करोड रुपैयाँ कटौती गरेका छन् ।
बलिउड हंगामाका अनुसार आयुष्मान खुरानाले फिल्मको एग्रिमेन्टमा २५ करोड रुपैयाँ लिने गरेका छन् तर अहिले उनले यसलाई घटाएर १५ करोड राखेका छन् ।
आयुष्मानको नजिकको एक स्रोतले भने, ‘अनेक’ र ‘चंडीगढ करे आशिकी’का कारण आयुष्मानको शुल्क २५ करोडबाट झरेर १५ करोडमा आएको छ । आयुष्मानको आगामी फिल्मका निर्माताहरूले उनलाई आफ्नो शुल्क घटाउन अनुरोध गरे र यो कठिन समयमा उनलाई समर्थन गर्न भने । योसँगै आयुष्मानले पनि यसमा सहमति जनाउँदै तुरुन्तै आफ्नो शुल्क १५ करोडमा घटाए ।’
आयुष्मान खुरानाको कामको कुरा गर्दा उनी चाँडै रकुल प्रीत सिंहको अपोजिट ‘डक्टर जी’ मा देखिनेछन् । फिल्म यसै वर्ष अक्टोबर १४ मा रिलिज हुँदैछ । यसबाहेक उनी अर्को वर्ष रिलिज हुने अनन्या पाण्डेसँग ‘ड्रिम गर्ल २’ मा देखिनेछन् ।