काठमाडौँ । विश्वव्यापी सार्वजनिक मामिलासम्बन्धी अमेरिकी कार्यवाहक सहायक विदेशमन्त्री एलिजाबेथ केनेडी ट्रुडोले बुधबार नेपाल भ्रमण गर्ने हुनुभएको छ ।
नेपालसहित संयुक्त अरब इमिरेट्स, उज्वेकिस्तान र किर्गिज गणतन्त्रको सेप्टेम्बर २८ देखि अक्टोबर ९ २०२२ सम्म भ्रमण गर्ने ट्रुडोले सुरुमा नेपालको भ्रमण गर्ने हुनुभएको अमेरिकी विदेश मन्त्रालयले जनाएको छ ।
आफ्नो १२ दिने भ्रमणका क्रममा उहाँले रुस र जनवादी गणतन्त्र चीनबाट फैलाइएको गलत सूचनाको प्रतिवाद गर्ने, अफगानिस्तानका जनतालाई जारी अमेरिकी समर्थन, सामाजिक समता, मिडिया स्वतन्त्रता र जलवायु परिवर्तनका मुद्दामा द्विपक्षीय कुराकानी गर्नुहुने मन्त्रालयको विज्ञप्तिमा उल्लेख छ ।
भ्रमणका क्रममा उहाँले सरकारी अधिकारीहरू र नागरिक समाज, विदेशी मिडिया आउटलेट र प्रेस, विद्यार्थी, पत्रकार र अमेरिकी सार्वजनिक कूटनीति खण्डहरूसँग भेट गर्ने कार्यक्रम छ ।
नेपालमा उहाँले अल्पसंख्यक समूहका अभियन्ता र मिडिया प्रतिनिधिसँग अन्तरक्रिया गर्नु हुनेछ ।
