काठमाडौँ । अमेरिकी सहायता परियोजना एमसीसीलाई लिएर सत्ता गठबन्धन टुट्न लागेको हो कि भन्ने आशङ्का बढेर गएको छ । खासगरी नेकपा (एकीकृत समाजवादी) का सम्मानित नेता झलनाथ खनालले प्रधानमन्त्री शेरबहादुर देउवाले गठबन्धन टुटाएर भए पनि एमसीसी पारित गर्न खोज्नुभएको आरोप लगाएपछि त्यस्तो आशङ्का बढेर गएको हो । प्रधानमन्त्री देउवाले मङ्गलबार राति नेकपा (एमाले) का अध्यक्ष केपी शर्मा ओलीसँग एमसीसी पारित गर्न सहयोग माग्नुभएपछि न्युज एजेन्सी नेपालसँग कुरा गर्दै नेता झलनाथ खनालले गठबन्धन टुट्नसक्ने सङ्केत दिनुभएको हो ।
नेकपा (माओवादी केन्द्र) र एकीकृत समाजवादीले संसद्मा टेबल भएको एमसीसीलाई यथास्थितिमा पारित गर्न नसकिने भन्दै एमसीसीको विपक्षमा मतदान गर्ने बताउँदै आएका छन् । एमसीसी संसद्बाट पारित नहुने चिन्ताबीच प्रधानमन्त्री देउवाले एमाले अध्यक्ष ओलीसँग सहयोग माग्नुभएको हो । तर ओलीले देउवालाई संसद् सुचारु गर्ने वातावरण बनाउन आग्रह गर्दै सुचारु भएको अवस्थामा एमसीसी पारित गर्न सकिने आश्वासन दिएको बुझिएको छ ।
गठबन्धनमै बसेर सरकारको प्रस्तावविरुद्ध जाने निर्णय गर्ने माओवादी केन्द्र र एकीकृत समाजवादीप्रति क्रुद्ध बन्नुभएका प्रधानमन्त्री देउवा गठबन्धन टुटाएरै भए पनि एमसीसी पारित गराउने मुढमा हुनुहुन्छ । यसका लागि उहाँले एमालेले राख्दै आएको मागलाई सम्बोधन गर्न सक्नुहुनेछ । तर गठबन्धनबाटै एमसीसी पारित होस् र गठबन्धन पनि नटुटोस् भनेर अन्तिम अवस्थासम्म प्रयासरत देउवाले आज बिहान माओवादी केन्द्रका अध्यक्ष पुष्पकमल दाहाल प्रचण्डलाई उहाँकै निवास खुमलटार पुगी भेटवार्ता गर्नुभयो ।
सम्भवतः भेटवार्तामा एमसीसी पारित गर्न प्रधानमन्त्री देउवाले माग्नुभएको सहयोगलाई अध्यक्ष प्रचण्डले अस्वीकार गर्नुभयो । त्यसैले गृहमन्त्री बालकृष्ण खाँणले समेत प्रचण्डसँग भेट गरेर एमसीसी पारित गर्न सहयोग नगरे गठबन्धन टुट्नसक्ने बताउनुभएको हुनसक्छ ।
किनकी प्रधानमन्त्री देउवा र गृहमन्त्री खाँणसँगको भेटपछि अध्यक्ष प्रचण्डको सचिवालयले अध्यक्ष प्रचण्डको भनाइ सार्वजनिक गरेको छ । त्यसमा भनिएको छ, “विश्व इतिहासमा हरेक क्रान्तिपछि प्रतिक्रान्तिहरु फेरि पुरानै सत्ता उल्ट्याउन भरमग्दुर कोशिस गर्छन् । अहिले नेपालमा पनि क्रान्ति र प्रतिक्रान्तिकारीहरुबीच सङ्घर्ष चलिरहेको छ । उनीहरुले कैयन षड्यन्त्र रचिरहेका र भ्रम छरिरहेका छन् । तर हामी ती सबै प्रपञ्चको जालो चिरेर विजयी हुनेछौँ ।”
