एजेन्सी । भारतीय चर्चित हास्यकलाकार राजु श्रीवास्तव एक महिनादेखि दिल्लीको एम्स अस्पतालमा भर्ना भएका छन् । राजुका फ्यानहरुले उनको शिघ्र स्वास्थ्य लाभको लागि दिनरात प्रार्थना गरिरहेका छन् । अगस्ट १० मा दिल्लीको एक होटलको जिममा हृदयघात भएपछि उनलाई एम्समा भर्ना गरिएको थियो ।
पूरै १ महिनामा उनको स्वास्थ्यमा लगातार उतारचढाव भइरहेको थियो । आईसीयूमा भर्ना हुँदा उनको स्वास्थ्य दुई पटक बिग्रियो भने दुवै पटक उनले मृत्युलाई जिते ।
गत बुधबार दिउँसो २ बजेदेखि बिहीबार बिहान ८ बजेसम्म राजुको आँखामा हल्का हलचल देखिएको परिवारका सदस्यले बताएका छन् । जबकि डाक्टरहरु यसलाई होसमा आउनु नभएको बताउँछन् ।
राजुलाई होशमा ल्याउन उनलाई मनपर्ने अभिनेता अमिताभ बच्चनको रेकर्ड गरिएको सन्देश राजुलाई सुनाइएको थियो । त्यसको बाबजुद २५ अगस्टमा उनले केही समयका लागि आँखा खोले ।
१९ अगस्टमा राजुको मस्तिष्कमा संक्रमण फैलिएपछि उनको अवस्था निकै नाजुक बन्दै गएको थियो । डाक्टरहरु पनि निकै चिन्तित थिए । बाँच्ने आशा पनि निकै कम थियो । यसअघि १० अगस्टमा हृदयघात भएपछि उनी मृत्युसँग लडेर विजयी भएका थिए ।
