काठमाडौंः नेपाली सिने अभिनेता पल शाह विरुद्ध बालयौन दुराचारको अभियोगमा नवलपुरको जिल्ला अदालतले दुई वर्ष ६ महिनाको कैद सजाय सुनाएको छ । हाल पल शाह किशोरी बलात्कारको अभियोगमा कारागारमा छन् ।
जिल्ला अदालत पूर्वी नवलपरासीका न्यायाधीश यज्ञप्रसाद आचार्यको इजलासले गरेको फैसलामा अभिनेता शाहसँग १० लाख रुपैयाँ क्षतिपूर्ति भराउन आदेश दिएको छ ।
शाहका पक्षबाट ६ जना अधिवक्ताले बहस गरेका थिए । मुलुकी अपराध संहिता २०७४ अनुसार शाहले बालयौन दुराचार गरेको ठहर गरेको हो । बलात्कार मुद्दामा भने उनले सफाइ पाएका छन् ।
बलात्कार गरेको अभियोग लगाएकी किशोरीले अदालतसमक्ष बयान फेरेर उनले बलात्कार नगरेको भन्दै बयानसमेत फेरेकी थिइन् । त्यही बयानलाई आधार मानेर अदालतले शाहले बालयौन दुराचार गरेको ठहर गरेको हो ।
जिल्ला प्रहरी कार्यालय तनहुँमा १७ वर्षीया किशोरीका बुबाले म्युजिक भिडियो छायांकनका क्रममा शाहले बारम्बार जबर्जस्ती करणी र यौन दुर्व्यवहार गरेको आरोप लगाउँदै गत फागुन ११ गते जाहेरी दर्ता गराएका थिए । जाहेरीमा म्युजिक भिडियो सुटिङका क्रममा पटकपटक करणी प्रयास गरेको र विवाहको प्रलोभन देखाई तनहुँमा करणी गरेको उल्लेख गरिएको थियो । तनहुँमा करणी हुँदा उनी १६ वर्ष मुनि रहेको जाहेरीमा उल्लेख थियो ।
