एजेन्सी । अहिले बलिउड जगतमा एक पछि अर्को फिल्महरु लगातार फ्लप भइरहेका छन् ।
ठूला बजेटदेखि ठूला स्टारकास्टसम्म सबैका फिल्मले लगानी समेत उठाउन सकेका छैनन् । हालै रिलिज भएका आमिर खान स्टारर ‘लाल सिंह चड्डा’, र अक्षय कुमार स्टारर ‘रक्षा बन्धन’ नराम्ररी फ्लप भएका छन् ।
गत साता रिलिज भएको प्यान इन्डिया फिल्म ‘लाइगर’को पनि अवस्था ठीक छैन । बलिउडमा देखिएको खतरालाई मध्यनजर गर्दै अब किंग खान अर्थात् शाहरुख खानले महत्वपूर्ण निर्णय लिएका छन् ।
शाहरुख खानले केही दिनअघि तीनवटा फिल्मको घोषणा गरेका थिए । उनका तीनवटै फिल्म पठान, जवान र डङ्की पाइपलाइनमा छन् ।
अहिले फ्यानहरुले उनलाई छिट्टै ‘डन ३’ मा हेर्ने इच्छा व्यक्त गरिरहेका छन् । तर मिडिया रिपोर्टका अनुसार शाहरुख खानले यो फिल्मको प्रस्ताव अस्वीकार गरेका छन् ।
हालै शाहरुखलाई यो फिल्मको अफर आएको थियो । फिल्मको स्क्रिप्ट फरहान अख्तरले लेखेका हुन् । तर अहिले शाहरुख त्यो स्क्रिप्टबाट सन्तुष्ट नभएको सुनिएको छ । जसका कारण उनले अहिले फिल्म गर्न अस्वीकार गरेका छन् । मिडिया रिपोर्टका अनुसार जब शाहरुख स्क्रिप्टको बारेमा पूर्णतया विश्वस्त हुनेछन्, तब उनी यो भूमिका फेरि गर्न चाहन्छन् ।
अहिले बक्स अफिसको परिदृश्य राम्रो नरहेको कारणले गर्दा उनी कुनै पनि प्रोजेक्ट साइन गर्नुअघि धेरै पटक सोच्न चाहन्छन् । अहिले फरहान फेरि ‘डन ३’ को स्क्रिप्टमा काम गरिरहेका छन् ।
डन ३ अझै प्रि–प्रोडक्सन चरणमा छ, त्यसैले दर्शकले फिल्म हेर्न लामो समय कुर्नुपर्नेछ । त्यतिन्जेल प्रशंसकहरूले शाहरुख खानलाई जवान र पठानमा देख्न सक्नेछन् । शाहरुखको पठान सिद्धार्थ आनन्दले निर्देशन गरेको फिल्म हो । यसमा उनीसँगै जोन अब्राहम र दीपिका पादुकोण पनि देखिनेछन् ।
