काठमाडौँ । स्पेनिस फुटबल क्लब बार्सिलोना र इंग्लिस क्लब म्यानचेस्टर सिटीले आज मैत्रीपूर्ण खेल खेल्दैछन् ।
बार्सिलोनाले खेल्ने शीर्ष लिग ला लिगामा दुई चरणका र सिटीले खेल्ने शीर्ष लिग इंग्लिस प्रिमियर लिगमा तेस्रो चरणका खेलहरु भइसकेका छन् ।
यस्तो अवस्थामा यी दुई क्लब आज बुधबार मध्यरात १ः१५ बजे बार्सिलोनाको घरेलु मैदान क्याम्प नोउमा आमनेसामने हुन लागेका हुन् ।
यसका लागि सिटीको टोली बार्सिलोना पुगेर दुई दिन प्रशिक्षण गरिसकेको छ । यस खेलका लागि सिनियर टोलीकै खेलाडी उतार्ने सिटीका प्रशिक्षक पेप गर्डिवालाको तयारी छ ।
यता बार्सिलोनाले पनि सिनियर टोलीका खेलाडी नै उतार्नेछ । मैत्रीपूर्ण खेल भएकाले टोलीले चाहेजति खेलाडी परिवर्तन गर्न पाउँछन् ।
नशासम्बन्धि घातक रोग एम्योट्रोफिक ल्याटरल स्क्लेरोसिस (एएलएस)बारे सचेतना जगाउन खेल आयोजना गरिएको हो । यस खेलबाट संकलित रकम लुजोन फाउन्डेसनलाई प्रदान गरिनेछ ।
यस्तै, पूर्व स्पेनिस तथा बार्सिलोना गोलरक्षक जोआन कार्लोस उन्जुएका लागि सहयोग रकम संकलन गरिने पनि बताइएको छ । उन्जुएलाई सन् २०२० मा एएलएस देखिएको थियो ।
