काठमाडौँ । जिल्ला प्रहरी कार्यालय बागलुङले २५ वर्षीय तुलबहादुर बिक ‘फर्से’ को हत्या अभियोगमा मृतककै पत्नी र सालीलाई पक्राउ गरेको छ ।
पक्राउ पर्नेमा २२ वर्षीया कुमारी कामी र १८ वर्षीया मनिषा बि.क. रहेका छन् । भाद्र १ गते ११ः१५ बजेको समयमा बागलुङ निसिखोला गाउँपालिका ४ कालीमाटीस्थित निसिखोलाको किनारमा वडा नं. ५ कामीडाँडा बस्ने २५ वर्षीय फर्से भन्ने तुल बहादुर बि.क.को घाटी काटिएको अवस्थामा टाउको नभएको लाश फेला परेको थियो ।
ज्यान सम्बन्धी कसुरको अनुसन्धानको क्रममा गत साउन २५ गते रातको समयमा मृतकलाई उनकै श्रीमती कुमारी कामीले दाउरा र घनले टाउकोमा प्रहार गरी बेहोस बनाइसकेपछि खुकुरीले टाउको छिनाई घर नजिकै रहेको निसीखोलामा लगि शवलाई खोलामा बगाईदिएको खुल्नमा आएको प्रहरीले जनाएको छ ।
उक्त घटनाको सूचना प्रहरीलाई जानकारी नगराउने कुमारी कामीकी बहिनी बर्ष १८ की मनिषा बिकलाई समेत प्रहरीले नियन्त्रणमा लिएको हो ।
प्रदेश प्रहरी कार्यालय र नेपाल प्रहरी प्रदेश कार्यालय पोखरा कास्कीको निर्देशन र सहयोगमा उनीहरुलाई शनिबार नियन्त्रणमा लिई आइतबार जिल्ला अदालत बागलुङबाट पाँच दिनको म्याद थप अनुमति लिई थप अनुसन्धान कार्य भईरहेको प्रहरीले जनाएको छ ।
