काठमाडौँ । केही दिनदेखि काठमाडौँ महानगरपालिकाका प्रमुख र धरान उपमहानगरपालिकाका प्रमुखबीचको ‘जुहारी’ ले निकै चर्चा पाएको छ । काठमाडौँ महानगरपालिकाका प्रमुख बालेन्द्र साह र धरान उपमहानगरपालिकाका प्रमुख हर्क साम्पाङबीच सामाजिक सञ्जाल फेसबुकमा भनाभन भइरहेको छ ।
शुक्रबार मात्र धरानका प्रमुख साम्पाङले फेसबुकमा भिडियोमार्फत भनेका छन्, “विशेषगरी यो मेरो लाईभचाहीँ मेरो विरोधीहरुलाई है । तपाईहरुको विरोधले हुन त के ख्यास्छ र ख्यास्न त । केहीपनि ख्यास्दैन म त आफ्नो वेमा हिड्ने मान्छे हो । तर मेरो विरोधले चाहीँ तपाईहरुलाई निकै पोल्दोरछ । जुनदिनसम्म काठमाडौँको फोहोर सोहोरिँदैन, सफा हुँदैन तबसम्म धरानलेमात्र होइन चारैतिरबाट प्रहार गर्नुपर्छ । काम न काजका हरु ”
त्यसो त गत स्थानीय तहको निर्वाचनमा आआफ्ना पालिकाबाट प्रमुख पदका लागि उम्मेदवारी दिँदा दुवैले निर्वाचन चिह्न ‘लौरो’ पाएका थिए । स्वतन्त्र उम्मेदवारी दिएका दुवै जनाले प्रमुख राजनीतिक दलका उम्मेदवारहरुलाई पराजित गरेका थिए ।
तर दुवै जनाबीच जुहारी नै चल्न थालेपछि कलाकार दीपकराज गिरीले टिप्पणी गर्दै आपसमा भनाभन नगर्न सुझाव दिएका छन् । उनले दुवै उम्मेदवारले पाएको निर्वाचन चिह्न लौरोलाई जुधाउँदा भाँचिने भन्दै लौरो टेक्न र आपत पर्दा बजाउन सल्लाह दिएका छन् ।
सामाजिक सञ्जाल फेसबुकमा गिरीले भनेका छन्, “लट्ठी टेक्ने हो !
आपत पर्दा बजाउने पनि हो !!
लट्ठी जुधाएरै भाँच्यौ भने
के टेक्छौ के बजाउछौ ?”
