फ्रान्समा लामो खडेरी परिरहेको छ । जमीनमा धाँजाहरु फाटेका छन् । तालहरु सुकेर माछा लगायतका जलचल मरेका छन् । फ्रान्समा रहेकी पत्रकार अनुराधा पौडेलका अनुसार खोलाको प्रवाह घटेर डुंगाहरु या पानीजहाज या सामान ओसार पोसार गर्ने ठूलो पानी डुंगाहरु चलाउन अप्ठेरो परेको छ भने कतिपय ठाउँमा डुंगा चलाउन नै प्रतिबन्ध लगाइएको छ ।
उनले सामाजिक सञ्जाल फेसबुकमा कतिपय गाउँमा खानेपानीको स्रोत घटेका कारण पिउनयोग्य पानी ट्यांकरबाट ओसारिएको र कतिपय नगरपालिकाले बिहान र बेलुका मात्र घरघरमा पिउन योग्य पानी वितरण गरिरहेको बताएकी छन् । किसानहरुलाई आफ्ना जनावरहरु जोगाउन हम्मे हम्मे परेको छ ।
पत्रकार पौडेलले फ्रान्स आगोभित्र परेको परेको छ भन्दै आगलागी नभएको कुनै पनि क्षेत्र बाँकी नरहेको उल्लेख गरेकी छन् । आगो निभाउन फ्रान्सको आफ्नो दमकल सेवाले नपुगेर अहिले जर्मनी, स्विडेन, इटाली, रोमानिया, स्पेन आदि ठाउँबाट पनि दमकल सेवाहरु झिकाइएको छ । टेलिभिजनहरुमा आगोको लप्काहरु माथि माथि पुगेको दृश्य देखिएका छन् । टेलिभिजनमा आगोको लप्काका भूमरीहरु माथि माथि आकाससम्म फैलिएको दृश्यहरु आएका छन् ।
फ्रान्समा आइतबारदेखि पानी पर्ने अनुमान गरिएको छ । यद्यपि पानी छरिएर नभई कतिपय ठाउँमा एकैठाउँमा मुसलधारे वर्षा हुने र त्यो वर्षाले बाढी निम्ताउने बताइएको छ । पत्रकार पौडेलका अनुसार फ्रान्समा यस्तो अनावृष्टि र आगलागिको संकट फ्रान्समा अहिलेसम्म मापन गरिएको छैन ।
