एजेन्सी । भारतको बिहारमा जेडीयू र भाजपाबीचको गठबन्धन ५ वर्षपछि फेरि टुटेको छ । बिहारका मुख्यमन्त्री नितिश कुमारले पदबाट राजीनामा दिएका छन् । उनले मंगलबार अपराह्न ४ बजेतिर राज्यपाल फागु चौहानलाई राजीनामा बुझाएका हुन् ।
नितिशले नयाँ सरकार बनाउने दाबी पनि राखेका छन् । उनले राज्यपाललाई १६० विधायकको समर्थन पत्र बुझाएका छन् । राजभवन बाहिर नितिशले भाजपासँगको गठबन्धन तोड्ने घोषणा गरे ।
उनले पार्टीका विधायक र सांसदहरूले एनडीएसँगको गठबन्धन तोड्न एक स्वरमा बोलेको बताए । त्यसलगत्तै नितिश सिधै राबडी देवीको घर पुगेर तेजस्वी यादवसँग भेट गरेको भारतीय सञ्चारमाध्यमले उल्लेख गरेका छन् ।
कांग्रेस विधायक शकील अहमद खानले नितिश कुमार महागठबन्धनको मुख्यमन्त्री हुने बताएका छन् । तेजस्वी यादव उपमुख्यमन्त्री हुने भएका छन् भने सभामुखको कुर्सी कांग्रेसले पाउन सक्ने बताइएको छ ।
