काठमाडौं । साफ यू–२० च्याम्पियनसिप फुटबल अन्तर्गत नेपालले आज आइतबार बलियो घरेलु टोली भारतको सामना गर्दैछ ।
भुवनेश्वरस्थित कालिंगा स्टेडियममा नेपालले तेस्रो खेलमा साविक विजेता भारतसँग खेल्न लागेको हो । नेपाल र भारतबीचको खेल बेलुका ७ः१५ बजे सुरु हुनेछ । नेपाल लगातार तेस्रो जितको खोजीमा हुनेछ । पहिलो खेलमा नेपालले माल्दिभ्सलाई ४–० तथा दोस्रो खेलमा श्रीलंकालाई ३–० गोल अन्तरले हराएको थियो ।
नेपाल २ खेलमा ६ अंक जोडेर दोस्रो स्थानमा रहेको छ । यदि भारतलाई हराएमा नेपाल शीर्ष स्थानमा उक्लनेछ । भारत पनि नेपाललाई हराएर दोस्रो जित निकाल्न चाहन्छ । भारत २ खेलमा ३ अंक जोडेर तेस्रो स्थानमा रहेको छ । फाइनलमा स्थान बनाउनका लागि भारतलाई नेपालविरुद्ध जित निकाल्नुपर्ने दबाब छ ।
च्याम्पियनसिपमा आयोजक भारत र नेपालसँगै श्रीलंका, बंगलादेश र माल्दिभ्सको सहभागिता रहेको छ ।
च्याम्पियनसिपमा सिंगल राउण्ड रोविनका आधारमा खेल हुनेछ र शीर्ष दुई टिमले फाइनल खेल्ने छन् । नेपालले अन्तिम खेल मंगलबार बंगलादेशसँग खेल्नेछ ।
