काठमाडौं । गृहमन्त्री बालकृष्ण खाँण शीतलनिवास पुगेका छन् । बिहीबार अपराह्न गृहमन्त्री खाँण राष्ट्रपति विद्यादेवी भण्डारीलाई भेट्न सितलनिवास पुगेका हुन् ।
राष्ट्रपति भण्डारीले गृहमन्त्रीसँग मुलुकको पछिल्लो सुरक्षा अवस्थाबारे जानकारी लिएको बताइएको छ । देशका विभिन्न भागमा आएको बाढी, पहिरा र डुबानका सन्दर्भमा पनि गृहमन्त्री खाँणले राष्ट्रपतिलाई ब्रिफिङ गरेका थिए ।
राष्ट्रपतिले महाकालीमा बेपत्ता भएका जयसिंह धामीको घटनाबारे पनि चासो राखेको बुझिएको छ । सरकारले दार्चुलामा तुइन तर्ने क्रममा बेपत्ता भएका धामी घटनाको प्रतिवेदन भदौ १५ गते सार्वजनिक गरेको थियो ।
धामी बेपत्ताबारे छानबिन समितिको निष्कर्षका आधारमा आवश्यक कूटनीतिक पहल गर्न गृह मन्त्रालयले बिहीबार परराष्ट्र मन्त्रालयलाई पत्राचार गरेको खाँणले राष्ट्रपतिलाई जानकारी गराएका थिए ।