बलिउडका अभिनेता अमिताभ बच्चनले अभिनय गरेको हिन्दी कथानक पारिवारिक मनोरंजनात्मक चलचित्र ‘उचाईं’ आगामी नोभेम्बर ११ (कार्तिक २५ गते) मा रिलिज हुने समाचार एजेन्सी एएनआईले जनाएको छ । यो चलचित्रको छायाँकन नेपालमा पनि भएको थियो ।
यो चलचित्रको निर्देशन सूरज बर्जात्यले गरेका हुन् । राजश्री प्रोडक्सनले यस चलचित्रमा अमिताभ बच्चन, अनुपम खेर, बोमन इरानी, नीना गुप्ता, सारिका, परिनिती चोपरा लगायतका कलाकारले अभिनय गरेका र चलचित्र निकै उत्कृष्ट बनेको जनाएको छ । यसमा वरिष्ट कलाकार डेनी डेन्जोङ्पा पनि छन् ।
यो चलचित्र सन् २०२१ को अक्टोबरमा नेपालबाट छायाँकन शुरु गरिएको थियो । सन् २०२२ को अप्रिलमा अनुपम खेरले इन्स्टाग्राममा चलचित्र निर्माण पूरा भएको बताएका थिए ।
सूरज बर्जात्यले यसअघि सन् २०१५ मा निकै लोकप्रिय चलचित्र ‘प्रेम रतन धन पायो’ को निर्देशन गरेका थिए जसमा सल्मान खान, सोनम कपूर र अनुपम खेरको मुख्य भूमिका थियो ।
