काठमाडौँ । नेपाल प्रेस युनियनको नवौँ राष्ट्रिय महाधिवेशन बाग्मती प्रदेशको राजधानी हेटौँडामा आजदेखि सुरु भएको छ ।
महाधिवेशनको उद्घाटन प्रधानमन्त्री एवं नेपाली कांग्रेसका सभापति शेरबहादुर देउवाले गरिसक्नुभएको छ ।
नयाँ कार्यसमिति चयन गर्ने महाधिवेशनमा उम्मेदवारी मनोनयनका लागि तिर्नुपर्ने दस्तुर निर्धारण गरिएको छ ।
अध्यक्ष पदको उम्मेदवारीका लागि मनोनयन दस्तुर रु ३० हजार राखिएको छ भने सबैभन्दा थोरै केन्द्रीय सदस्यका लागि रु १५ हजार निर्धारण गरिएको छ ।
यद्यपि पत्रकारहरुका लागि त्यति धेरै मनोनयन दस्तुर राखिएकामा तीव्र आलोचना भएको छ । श्रमजीवी पत्रकारले त्यति धेरै दस्तुर तिर्न नसक्ने भन्दै प्रेस युनियनले मनोनयन दस्तुरका नाममा व्यापार गर्न नहुने आवाज उठेको छ ।
महाधिवेशनमा महिला उपाध्यक्षमा उम्मेदवारी दिने घोषणा गरेकी सलोजा अधिकारीले सरकारले तोकेको रु १९ हजार ५०० न्यूनतम पारिश्रमिकका लागि लडाइँ गरिरहेका पत्रकारहरुले त्यत्रो पैसा तिर्न नसक्ने बताएकी छन् ।
उनले सामाजिक सञ्जालमा पोष्ट गर्दै लेखेकी छन्, “नेपाल प्रेस युनियन श्रमजिवी पत्रकारको संस्था हो । सरकारले तोकेको (१९५००) न्यूनतम पारिश्रमिकका लागि लडाइँ गरिरहेका पत्रकारले यो पैसा कसरी तिर्न सक्छन् ? यो संस्था व्यापारीको होइन ।”
