काठमाडौँ । नेकपा (माओवादी केन्द्र) का अध्यक्ष पुष्पकमल दाहाल प्रचण्डले आफूहरुले नेकपा (एमाले) मा बीउ रोपेर आएको भन्दै अब केही समयपछि फल्ने बताउनुभएको छ ।
बुधबार पार्टी कार्यालयमा आयोजित पार्टी प्रवेश कार्यक्रममा उहाँले एमालेसँग तीन वर्ष सँगै रहँदा आफूहरुले एमालेमा बीउ रोपेर आएको बताउनुभयो । उहाँले एमालेभित्रका हजारौँ नेता कार्यकर्तालाई एकीकृत गरेर लैजान सकिने अनुभव आफूलाई प्राप्त भएको बताउनुभयो । उहाँले भन्नुभयो, “एमालेभित्र हामी माओवादीले बीउ रोपेका छौँ, हेर्दै गर्नुहोला केही समयपछि त्यो बीउ फुल्छ र फल्छ ।”
अध्यक्ष प्रचण्डले एमालेभित्र केपी ओली प्रवृत्तिको नेतृत्वका कारण विद्रोह गर्नुपरेको स्पष्ट पार्नुभयो । सो पार्टीभित्र केपी ओली नभएको भए हजारौँ नेता तथा कार्यकर्तालाई समाजवादीको यात्रामा डोर्याउन सकिने उहाँको भनाइ थियो ।
सो अवसरमा उहाँले नेत्रविक्रम चन्द विप्लव नेतृत्वको नेपाल कम्युनिष्ट पार्टी छाडेका नेताहरू ओम पुन र शंकर खड्का लगायतलाई माओवादीमा प्रवेश गराउनुभएको थियो ।
