काठमाडौँ । काठमाडौँ जिल्ला अदालतका न्यायाधीश राजकुमार कोइरालासँग घुस बार्गेनिङ गर्ने अधिवक्ता रुद्रप्रसाद पोखरेललाई नेपाल बार काउन्सिलले सात दिनभित्र सो बारे जवाफ दिन भनेको छ ।
काउन्सिलको बुधबार बसेको बोर्ड बैठक र लगत्तै बसेको अनुशासन समितिको बैठकले उनलाई घुस बार्गेनिङ सम्बन्धमा स्पष्टीकरण दिन सात दिनको समय दिएको हो ।
न्यायाधीश कोइराला र अधिवक्ता पोखरेलबीचको अडियो सार्वजनिक भएपछि र नेपाल बार एसोसिएसनको विज्ञप्तिका आधारमा बार काउन्सिलले म्याद जारी गरेर स्पष्टीकरण सोध्ने निर्णय गरेको हो । बोर्ड बैठकले भने अधिवक्ता पोखरेललाई कारबाही गर्न अनुशासन समितिमा सिफारिस गरेको थियो ।
अनुशासन समितिमा महान्यायाधिवक्ता खम्मबहादुर खातीको नेतृत्वमा नेपाल बारका पूर्वअध्यक्ष चण्डेश्वर श्रेष्ठ र रदिसभक्त प्रधानांग सदस्य रहेका छन् ।
अधिवक्ता पोखरेलको स्पष्टीकरण आएपछि थप प्रमाण बुझ्ने वा कारवाही गर्ने भन्ने अनुशासन समितिले निर्णय गर्न सक्नेछ । बार काउन्सिलले नसिहत दिने, निलम्बन गर्ने वा प्रमाणपत्र नै रद्द गर्ने निर्णय गर्न सक्छ ।
अधिवक्ता पोखरेलमाथि न्यायाधीश कोइरालालाई दुई करोड रुपैयाँ घुस दिएर सहकारी ठगी मुद्दाका अभियुक्त इच्छाराज तामाङलाई धरौटीमा छुटाउन खोजेको आरोप लागेको छ । सोसम्बन्धी अडियो नै सार्वजनिक भएको थियो ।
पोखरेल नेपाल बार एसोसिएसनका पूर्व कोषाध्यक्षसमेत हुन् ।
