एजेन्सी । भारतीय चर्चित गायक केकेको मे ३१ राति १० बजे निधन भएको छ । केके कन्सर्ट गर्न कोलकाता पुगेका थिए तर कन्सर्ट लगत्तै होटलमा उनको स्वास्थ्य बिग्रियो ।
उनलाई टोलीले अस्पताल पुर्याएको थियो तर अस्पताल पुग्नुअघि नै उनको मृत्यु भएको थियो ।
५३ वर्षीय गायकले आफ्नो सामाजिक सञ्जाल अकाउन्टबाट आफ्नो कन्सर्टका केही झलक शेयर गरेका थिए । कोलकाताको नजरुल मञ्चमा प्रस्तुति दिएपछि केके होटल एस्प्लेनेड पुगे ।
केके सिँढी नजिकै बेहोस हुँदा, उनलाई तुरुन्तै कोलकाता मेडिकल रिसर्च इन्स्टिच्युटमा लगियो, जहाँ डाक्टरले उनलाई मृत घोषित गरे । गायकको मृत्युको कारण हृदयघात भएको बताइएको छ ।
केकेको निधनको खबर आउने बित्तिकै भारतीय प्रधानमन्त्री नरेन्द्र मोदीले आफ्नो ट्वीटर ह्यान्डल मार्फत शोक व्यक्त गरेका छन् । उनले लेखेका छन्, ‘केके नामबाट चर्चित गायक कृष्णकुमार कुननाथको असामयिक निधनले दुःखी छु । उहाँका गीतहरूले सबै उमेरका मानिसहरूलाई जोड्ने भावनाहरूको दायरालाई चित्रण गरेको छ । उहाँका गीतहरूबाट उहाँलाई हामी सधैं सम्झिरहनेछौं । उहाँका परिवार र फ्यानहरूलाई समवेदना । ओम शान्ति ।’
