एजेन्सी । आईपीएल २०२२ को ३१ औं खेलमा रोयल च्यालेन्जर्स बैंगलोरले शानदार जित दर्ता गरेको छ ।
फाफ डु प्लेसिसको कप्तानीमा रहेको बैंगलोरले लखनउ सुपर जाइन्ट्सलाई १८ रनले पराजित गरेको हो । मुम्बईको डीवाई पाटिल स्टेडियममा भएको खेलमा बैंगलोरले १ सय ८१ रनको सफलता पूर्वक रक्षा गर्दै लखनउलाई १६३ रनमा सीमित गर्यो ।
बैंगलोरले यो सिजनको पाँचौं जित निकाल्दै अंक तालिकाको दोस्रो स्थानमा उक्लिएको छ । बैंगलोरका लागि फाफ डु प्लेसिसले ९६ रन बनाए भने जोस हेजलउडले चार विकेट लिए ।
रोयल च्यालेन्जर्स बैंग्लोरलाई दिएको १८२ रनको लक्ष्य पछ्याएको लखनउ सुपर जाइन्ट्सको सुरुवात राम्रो हुन सकेन । टोलीका ओपनर क्विन्टन डी कक मात्र तीन रनमा आउट भए र लखनउले १७ रनको स्कोरमा आफ्नो पहिलो विकेट गुमाएको थियो । यसपछि मनिष पाण्डेले पनि खासै केही गर्न सकेनन् । उनी ६ रन बनाएर पभिलियन फर्किए । दुवै खेलाडीलाई जोस हेजलवुडले आउट गरेका थिए ।
त्यसपछि कप्तान केएल राहुलले केही द्रुत शट खेलेर इनिङ्सलाई अगाडि बढाउने प्रयास गरे । तर, उनी पनि ३० रन बनाएर आउट भए । उनलाई कार्तिकको हातबाट हर्षल पटेलले क्याच आउट गराएका थिए ।
एक समयमा लखनउको टोली ६४ रनमा तीन विकेट गुमाएपछि समस्यामा परेको थियो । तर क्रुणाल पाण्ड्या र दीपक हुड्डाले चौथो विकेटका लागि ३६ रनको साझेदारी गरे । हुड्डा केही समयमै १३ रन बनाएर आउट भए । त्यसपछि क्रुणाल पाण्ड्याले पनि २८ बलमा ४२ रन बनाएर अगाडि बढे । क्रुणाल बाहेक अरु कुनै खेलाडीले लामो समय टिक्न सकेनन् र प्रत्येक अन्तरालमा विकेटको पतनका कारण लखनउको टोलीले २० ओभरमा आठ विकेट गुमाएर १६३ रन मात्रै बनाउन सक्यो ।
यसअघि लखनउको टोलीले टस जितेर बैंगलोरलाई पहिले ब्याटिङको निम्तो दिएको थियो । बैंगलोरको खराब सुरुवात रह्यो । पहिलो ओभरमा अनुज रावत र विराट कोहली दुवै पभिलियन फर्किए । दुवैलाई लगातार दुई बलमा दुष्मन्त चमिराले आउट गरे । विराट पहिलो बलमै खाता नखोल्दै आउट भए ।
बैंग्लोरको टोलीले सात रनको स्थितीमा दुई विकेट गुमाएको थियो । तर, फाफ डु प्लेसिस र ग्लेन म्याक्सवेलले उत्कृष्ट शट खेल्दै २६ बलमा ३७ रनको साझेदारी गरे । यद्यपि, म्याक्सवेल ११ बलमा २३ रन बनाएर पभिलियन फर्किए । उनलाई क्रुणालले आउट पारेका थिए । यसपछि सुयश प्रभुदेसाई पनि छिट्टै पभिलियन फर्किए ।
६२ रनमा चार विकेट गुमाएपछि बैंगलारको टोली एक समय समस्यामा परेको थियो । तर डु प्लेसिस र शाहबाज अहमदले पाँचौं विकेटका लागि ७० रनको बलियो साझेदारी गर्दै टोलीको स्कोर १३२ रनमा पुर्याएका थिए । शाहबाज २२ बलमा २६ रन बनाएर आउट भए । अर्कोतर्फ, डु प्लेसिसले रन बनाउने क्रम जारी राख्दै आफ्नो अर्धशतक पूरा गरे । उनी अन्तिम ओभरमा ६४ बलमा ९६ रन बनाएर आउट हुँदा दिनेश कार्तिक आठ बलमा १३ रन बनाएर अविजित रहे ।
आजको खेलः दिल्ली क्यापिटल्सविरुद्ध पञ्जाब किंग्स – ७ः४५ बजे
