काठमाडौं । नेपालका नेताहरुको विदेश भ्रमणमा आउँदो शुक्रबार एक गज्जबको संयोग जुरेको छ । त्यस दिन नेकपा एमालेका उपाध्यक्ष तथा पूर्वउपप्रधानमन्त्री विष्णु पौडेलको नेतृत्वमा गत सोमबार चीन गएको पार्टीको प्रतिनिधिमण्डल स्वदेश फर्कदै छ ।
चीनको कुन्मिङमा आयोजना भएको एक कार्यक्रममा भाग लिन गएको त्यस टोलीमा स्थायी कमिटी सदस्य काशीनाथ अधिकारी, लेखा आयोगका अध्यक्ष तथा राष्ट्रिय योजना आयोगका पूर्वउपाध्यक्ष डा पुष्पराज कँडेल र केन्द्रीय कमिटी सदस्य तथा कर्णाली प्रदेशसभा सदस्य मीनासिंह रखाल रहनुभएको छ ।
उता एमालेको टोली फर्किने नै दिन पारेर माओबादीको एक टोली चीन जाने कार्यक्रम तय भएको छ । प्रभावशाली नेता तथा पूर्वमन्त्री वर्षमान पुन, उहाँकी श्रीमती तथा माओवादी नेत्री ओनसरी घर्ती र अर्का माओबादी नेता देव गुरुङ चीन जादैं हुनुहुन्छ । नेता पुन उपचार गराएर गत माघ १० मा मात्रस्वदेश फर्कनु भएको थियो ।
क्रिकलर नाजार टाइप टु सिन्ड्रोम नामक दुर्लभ बंशाणुगत जण्डिसको उपचार पुनले चीन सेनजेनको थर्ड पिपुल्स हस्पिटल अफ सेनजेनमा गराएर स्वदेश फर्कनु भएको थियो ।
नेता पुनको सेनजेनमा ३९ र बैंककमा ५९ दिन उपचार भएको थियो । सोही उपचारको लागि पुन चीन जान लाग्नु भएको हो । यस पटक उहाँसँग नेता देब गुरुङ पनि चीन जादै हुनुहुन्छ ।
त्यस दिन अर्काे एक संयोग पनि जुरेको छ चिनियाँ विदेशमन्त्री नेपाल आउने । आगामी शुक्रबार साँझ नै चिनियाँ बिदेशमन्त्री वाङ यी भारत हुँदै नेपाल आउने कार्यक्रम रहेको छ । विदेशमन्त्री वाङ यीले राष्ट्रपति, प्रधानमन्त्री, नेकपा एमाले अध्यक्ष केपी ओली, माओबादी केन्द्रका अध्यक्ष पुष्पकमल दाहाल र परराष्ट्रमन्त्री डा नारायण खड्कासँग भेटवार्ता गर्ने कार्यक्रम रहेको छ ।
