काठमाडौँ । धुर्मुस–सुन्तली फाउन्डेसनले चितवनको भरतपुर महानगरपालिकामा बनाउन लागेको ‘गौतम बुद्ध अन्तर्राष्ट्रिय क्रिकेट रंगशाला’को नाममा विवाद परेको छ ।
राष्ट्रिय खेलकुद परिषद् (राखेप)का अनुसार आर्थिक वर्ष २०७५–०७६ को कार्ययोजनामा नै यो रंगशाला समावेश गरेर बजेटसमेत विनियोजन भइसकेको अवस्थामा धुर्मुस–सुन्तली फाउन्डेसनले पनि उहि नाम राखेर मैदान बनाउन लागेपछि विवाद सृजना भएको हो ।
राखेपाले आफुहरुसँग छलफल नै नगरि धुर्मुस सुन्तली फाउण्डसेनले अर्को रंगशाला उहि नाममा बनाए कानूनी र व्यवहारिक रुपमा अप्ठ्यारो चेतवानी दिएको छ ।
राखेप सदस्य सचिव केशवकुमार विष्टले बजेटसमेत विनियोजन गरिसकेकाले यही नाममा रंगशाला बनाउने बताए । उनले भने, ‘हामी लामो समयदेखि रंगशाला निर्माण प्रक्रियामा अघि बढेका हौं र यही नाम रहन्छ ।’
धुर्मुस सुन्तली फाउन्डेसनले युवा तथा खेलकुद मन्त्रालय र राखेपसँग समन्वय नगरेको उनको आरोप छ । ‘सरकार पहिल्यै अघि बढिसकेको छ, उहाँहरुले हामीसँग समन्वय गर्न पथ्र्यो । अध्ययन गर्नुपथ्र्यो,’ विष्टले भने ।
उनले खेलकुदको सर्वोच्च निकाय भनेको राखेप र खेलकुद मन्त्रालय भएको र सम्बन्धित निकायसँग समन्वय नगरिकन जाँदा यस्तै खालका समस्याहरु उत्पन्न हुने विचार व्यक्त गरेका छन् ।
उनले समन्वय गरे एउटा विधि खोज्ने र समन्वयन नगरे आफ्नो नाममा अघि बढ्ने जानकारी दिए ।
१६ माघमा धुर्मुस सुन्तली फाउन्डेसन र भरतपुर महानगरपालिकाबीच ‘गौतम बुद्ध अन्तर्राष्ट्रिय क्रिकेट रंगशाला’ निर्माणको सम्झौता भएको थियो। उक्त कार्यक्रममा प्रधानमन्त्री केपी शर्मा ओली, खेलकुदमन्त्री विश्वकर्मा पनि उपस्थित थिए । तीन अर्ब लागतमा २५ हजार दर्शक क्षमताको रंगशाला बन्ने धुर्मुस–सुन्तली फाउन्डेसनले जानकारी गराएका थिए ।
