काठमाडौं । बूढीगण्डकी नदीमा आएको बाढी प्रभावित क्षेत्रबाट हालसम्म ४७ जनाको सकुशल उद्धार गरी सुरक्षित स्थानमा सारिएको छ । बाढी प्रभावित क्षेत्रमा खोज तथा उद्धारका लागि नेपाली सेनाका चारवटा हेलिकप्टरसहित ३८६ जना सुरक्षाकर्मी परिचालन गरिएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।
आइतबार दिउँसो आयोजित पत्रकार सम्मेलनमा प्राधिकरणका कार्यकारी प्रमुख डा. धर्मराज उप्रेतीले बाढीका कारण गोरखाका विभिन्न स्थानमा पुल, घर तथा जलविद्युत् आयोजनाका संरचनामा क्षति पुगेको जानकारी दिनुभयो ।
उहाँका अनुसार गोरखाको चुमनुब्री गाउँपालिका–३ न्याक्चेतबाट सिर्दीवास जोड्ने पुरानो झोलुङ्गे पुल बाढीले बगाएको छ । सोही क्षेत्रमा एउटा घर बगाएको र अर्को घरमा बाढी पसेको छ । त्यस्तै, धार्चे गाउँपालिका–५ माछीखोलाबाट करौँजा जोड्ने झोलुङ्गे पुलसमेत बगाएको छ ।
बाढीले धार्चे गाउँपालिका–३ सल्लेरीस्थित निर्माणाधीन सहज ऊर्जा पावर हाउस र आसपासका सातदेखि आठवटा घर बगाएको सूचना प्राप्त भएको प्राधिकरणले जनाएको छ ।
यसैगरी, आरुघाट गाउँपालिका–९ नयाँपुलस्थित गोरखा र धादिङ जोड्ने पक्की पुलको गोरखातर्फको एउटा भाग बगाएको छ । आरुघाट गाउँपालिका–२ र ३ जोड्ने सोतीस्थित फलामे पुलसमेत बाढीले बगाएको छ ।
बाढीका कारण माछीखोलाको तल्लो बस्तीका २० भन्दा बढी घर जोखिममा परेका छन् । बूढीगण्डकी ३४१ मेगावाट जलविद्युत् आयोजनाको मुख्य क्याम्प क्षेत्र र निर्माण उपकरणमा समेत क्षति पुगेको छ । त्यस्तै, दोभान खोला २४.५ मेगावाट आयोजनाको क्याम्प क्षेत्रका केही घरमा क्षति पुग्नुका साथै बेलीब्रिज बगाएको प्राधिकरणले जनाएको छ ।
कार्यकारी प्रमुख उप्रेतीका अनुसार बाढीको वास्तविक कारण पत्ता लगाउन तथा क्षतिग्रस्त संरचनाको अवस्था अध्ययन गर्न प्राधिकरण र सडक विभागको प्राविधिक टोली ड्रोनसहित प्रभावित क्षेत्रमा परिचालन गरिएको छ । आरुघाटस्थित क्षतिग्रस्त पक्की पुलको स्थानमा तत्काल बेलीब्रिज राख्न सकिने वा नसकिने विषयमा पनि सम्भाव्यता अध्ययन भइरहेको उहाँले बताउनुभयो ।
खोज तथा उद्धार कार्यका लागि नेपाली सेनाका १२७ जना, नेपाल प्रहरीका ८३ जना र सशस्त्र प्रहरी बल नेपालका १७७ जना सुरक्षाकर्मी परिचालन गरिएको छ ।बाढीबाट भएको मानवीय तथा भौतिक क्षतिको थप विवरण संकलन भइरहेको प्राधिकरणले जनाएको छ ।
— न्युज एजेन्सी नेपाल
