काठमाडौं । नेपाली कांग्रेसका नेता तथा पार्टीको १५औँ महाधिवेशनमा सभापति पदका उम्मेदवार श्यामकृष्ण खड्गीले पार्टीभित्रको गुट–उपगुट अन्त्य गर्दै सबै नेता तथा कार्यकर्ता एकजुट भएर अघि बढ्नुपर्ने बताउनुभएको छ ।
सोमबार पत्रकार सम्मेलन गर्दै खड्गीले महाधिवेशनको आन्तरिक निर्वाचन सकिएकाले अब विजय र पराजयलाई बिर्सेर पार्टी एकता सुदृढ गर्ने अभियानमा जुट्नुपर्ने बताउनुभएको हो । उहाँले सभापतिमा निर्वाचित गगन थापालाई आफूले सक्दो सहयोग गर्ने प्रतिबद्धता जनाउँदै महाधिवेशनमा पराजित भएका नेताहरूलाई पनि सँगै लिएर अघि बढ्न सभापति थापालाई आग्रह गर्नुभयो ।
खड्गीले विजयी पक्षले पराजित पक्षलाई र पराजित पक्षले विजयी पक्षलाई सहयोग गर्ने संस्कार विकास गर्न सके मात्रै कांग्रेस बलियो र गुटरहित बन्ने बताउनुभयो । महाधिवेशनमा फरक समूहबाट उम्मेदवारी दिएको वा एकअर्कालाई सहयोग नगरेको आधारमा पार्टीभित्र टुटफुट र विभाजन हुन नहुने उहाँको भनाइ छ ।
“अब विजेता साथीहरूले पराजित हुने साथीहरूलाई सँगै लिएर हिँड्नुपर्छ । पराजित हुने साथीहरूले पनि विजयी हुने साथीहरूलाई सहयोग गर्दै अगाडि बढ्ने संस्कृतिको विकास गर्नुपर्छ,” उहाँले भन्नुभयो, “विजय र पराजय भएका साथीहरूलाई सँगै लग्यो भने मात्रै पार्टी एकढिक्का हुन्छ, बलियो हुन्छ र गुटरहित कांग्रेस बन्छ ।”
उहाँले पार्टीभित्रका आन्तरिक समस्या आन्तरिक रूपमै समाधान गरी जनतामाझ कांग्रेस एकताबद्ध रहेको सन्देश दिनुपर्नेमा जोड दिनुभयो । कांग्रेसका नेताहरूले सार्वजनिक रूपमा एकअर्काको आलोचना गर्दा जनतामा पार्टीप्रति नकारात्मक सन्देश जाने भन्दै उहाँले यस्तो प्रवृत्ति त्याग्न आग्रह गर्नुभयो ।
खड्गीले फागुन २१ गतेको निर्वाचनमा भएको पराजयलाई शिक्षाका रूपमा लिनुपर्ने बताउनुभयो । पराजित मानसिकताबाट बाहिर निस्केर जनतासँगको सम्बन्ध बलियो बनाउँदै आगामी स्थानीय तह र प्रदेश निर्वाचनमा पार्टीलाई विजयी गराउने लक्ष्यका साथ अघि बढ्नुपर्ने उहाँको भनाइ छ ।
उहाँले क्रियाशील सदस्यदेखि वडा, नगर, क्षेत्र, जिल्ला, प्रदेश र केन्द्रीय तहसम्मका नेता तथा कार्यकर्तालाई एकताबद्ध भएर संगठन निर्माणमा लाग्न आग्रह गर्नुभयो । कांग्रेसलाई मन पराउने, पार्टीलाई मत दिने तथा संगठनको अभियानमा जोडिएका नागरिकको भावना बुझेर काम गर्नुपर्ने उहाँले बताउनुभयो ।
कांग्रेसको राजनीतिक पहिचान सुधार गर्न नैतिकता, इमानदारी र सत्य बोल्ने संस्कार विकास गर्नुपर्नेमा पनि खड्गीले जोड दिनुभयो । पार्टीका नेता तथा कार्यकर्ताले जनतामाझ सत्य बोल्ने, प्रतिबद्धताअनुसार काम गर्ने र भ्रम नफैलाउने व्यक्तिका रूपमा आफूलाई स्थापित गर्नुपर्ने उहाँको भनाइ छ ।
“कांग्रेसका नेता तथा कार्यकर्ताले जे बोल्छन्, त्यही गर्छन् भन्ने किसिमको संस्कार विकास गर्नुपर्छ,” उहाँले भन्नुभयो, “हामीले उच्च नैतिकताका साथ अगाडि बढ्नुपर्ने स्थिति छ । यस किसिमको अभियानमा मेरो पनि साथ र सहयोग रहन्छ ।”
जीवन्त राजनीतिक पार्टीमा गुट तथा उपगुट देखिन सक्ने भए पनि महाधिवेशन सम्पन्न भएपछि त्यसलाई संस्थागत रूपमा अन्त्य गर्नुपर्ने खड्गीको धारणा छ । पार्टीभित्र संस्थागत संस्कारको विकास गर्दै सबैलाई समेटेर अघि बढे मात्रै कांग्रेसले जनताको विश्वास पुनः आर्जन गर्न सक्ने उहाँले बताउनुभयो ।
