काठमाडौँ । ऊर्जा, जलस्रोत तथा सिँचाइ मन्त्री विराजभक्त श्रेष्ठले विद्युत महसुल डिजिटल माध्यमबाट भुक्तानी गर्न नागरिकलाई अपिल गर्नुभएको छ।
मन्त्री श्रेष्ठले डिजिटल युगमा समेत ७३ प्रतिशत नागरिकले विद्युत महसुल भुक्तानीका लागि भौतिक रूपमा काउन्टरमै पुग्ने गरेको तथ्यांक प्रस्तुत गर्दै अब यो अवस्थालाई परिवर्तन गर्नुपर्ने बताउनुभएको हो। उहाँले डिजिटल भुक्तानीलाई प्रवर्द्धन गर्न सचेत नागरिकको सहयोग आवश्यक रहेको उल्लेख गर्नुभएको छ।
मन्त्री श्रेष्ठका अनुसार नेपाल विद्युत प्राधिकरणका १२९ वितरण केन्द्रअन्तर्गतका प्रशाखामा हाल ६५५ वटा महसुल संकलन काउन्टर सञ्चालनमा छन्। ती काउन्टर सञ्चालनमा मात्रै वार्षिक करिब ५९ करोड ७९ लाख रुपैयाँ खर्च हुने गरेको उहाँले जानकारी दिनुभएको छ। यसको मासिक खर्च करिब ५ करोड रुपैयाँ पुग्ने उहाँको भनाइ छ।
डिजिटल माध्यमबाट महसुल भुक्तानी गर्दा नागरिकको समय र आवतजावतमा लाग्ने खर्च बचत हुनुका साथै नगद कारोबार घट्दा वित्तीय पारदर्शिता र सुरक्षा बढ्ने मन्त्री श्रेष्ठले बताउनुभएको छ। काउन्टर सञ्चालनमा खर्च हुने स्रोत तथा जनशक्तिलाई अन्य आवश्यक ग्राहक सेवामा परिचालन गर्न सकिने उहाँको धारणा छ।
मन्त्री श्रेष्ठले परिवार, इष्टमित्र, छरछिमेकी तथा आफूले चिनेका नागरिकलाई डिजिटल भुक्तानीबारे जानकारी दिन र सिकाउन आग्रह गर्नुभएको छ। विशेषगरी डिजिटल भुक्तानी गर्न नजान्ने बुबाआमा, ज्येष्ठ नागरिक तथा आफन्तलाई सहयोग गर्न उहाँले अपिल गर्नुभएको हो।
उहाँले सम्भव भएसम्म आजैदेखि डिजिटल माध्यमबाट विद्युत महसुल भुक्तानी गर्न सुरु गर्न पनि आग्रह गर्नुभएको छ। मन्त्री श्रेष्ठले डिजिटल भुक्तानीको प्रवर्द्धन केवल प्रविधिको प्रयोग बढाउने विषय नभई नागरिकको समय बचत, सेवा सहजता, वित्तीय पारदर्शिता र सार्वजनिक स्रोतको प्रभावकारी उपयोगसँग जोडिएको साझा अभियान भएको बताउनुभएको छ।
