जनकपुर । नेपाली कांग्रेसका नेता विमलेन्द्र निधीले पार्टी औपचारिक रूपमा विभाजित भएको घोषणा गर्नुभएको छ ।
जनकपुरमा आयोजित कार्यक्रममा बोल्दै नेता निधीले विशेष महाधिवेशनले कांग्रेसलाई वैचारिक र सांगठनिक रूपमा दुई धारमा विभाजित गरिदिएको दाबी गर्दै अब ‘नयाँ घर’ निर्माणको दिशामा अघि बढ्नुको विकल्प नरहेको बताउनुभयो ।
पार्टी विभाजनको मुख्य जिम्मेवार विशेष महाधिवेशन बोलाउने पक्ष नै रहेको आरोप लगाउँदै निधीले लोकतन्त्र भनेको सिद्धान्त मात्र नभई प्रक्रिया र पद्धति पनि भएको बताउनुभयो । बहुमतका आधारमा मात्रै पार्टी सञ्चालन हुन नसक्ने उहाँको भनाइ थियो ।
निर्वाचन आयोगमा पेश गरिएको तथ्यांकलाई आधार मान्दै आफूहरूसँग ४६ प्रतिशतको बलियो आधार रहेको दाबी गर्दै निधीले उक्त मतलाई अवमूल्यन गरेर गरिएका निर्णय स्वीकार्य नहुने जिकिर गर्नुभयो । विशेष महाधिवेशन र त्यसपछि विकसित घटनाक्रमले पार्टीलाई पुनः जोड्न नसक्ने भन्दै उहाँले अब नयाँ ढंगबाट संगठन निर्माणमा लाग्नुपर्ने बताउनुभयो ।
उहाँले भन्नुभयो, ‘जसले विशेष महाधिवेशन बोलायो, उसैले पार्टी फुटाएको हो । हामीले सुरुदेखि नै प्रक्रियाको कुरा उठाउँदै आएका थियौँ, तर त्यसलाई बेवास्ता गरियो । पुराना पुस्ताका नेताहरूले अझै पनि आफ्नो जिम्मेवारी पूरा गरिरहेका छन् । त्यसैले हामीले अझ मिहिनेतका साथ नयाँ कार्यदिशा तय गर्नुपर्छ ।’
निधीले विगतमा गिरिजाप्रसाद कोइराला र शेरबहादुर देउवा मिल्न तीन वर्ष लागेको प्रसंग उल्लेख गर्दै आगामी दिनमा परिस्थिति कसरी अघि बढ्छ भन्ने यकिन गर्न नसकिने बताउनुभयो । अहिले भने संगठन निर्माणलाई प्राथमिकतामा राख्नुपर्ने उहाँको भनाइ थियो ।
आगामी स्थानीय तहको निर्वाचनलाई लक्षित गर्दै निधीले कार्यकर्तालाई वडास्तरबाटै नयाँ ऊर्जा र उत्साहका साथ संगठन निर्माणमा जुट्न निर्देशन दिनुभयो । युवा पुस्तालाई नेतृत्वमा ल्याउनुपर्नेमा जोड दिँदै उहाँले आफू वैचारिक रूपमा अझै सक्रिय रहेको र पार्टी पुनर्निर्माणका लागि प्रतिबद्ध रहेको बताउनुभयो ।
उहाँले कार्यकर्तालाई निराश नहुन आग्रह गर्दै पञ्चायतकालको उदाहरण दिँदै संगठन बलियो भए जस्तोसुकै अवरोध पार गर्न सकिने बताउनुभयो।
