पोखरा । बडादशैँ र तिहारजस्ता चाडपर्व नजिकिँदै गर्दा पोखरासहित देशभर अनलाइन ठगीका घटना बढ्न थालेका छन् । सामाजिक सञ्जालमा आकर्षक विज्ञापन राखेर सस्तो मूल्यमा सामान उपलब्ध गराउने प्रलोभन देखाउँदै अग्रिम भुक्तानी लिएर सम्पर्कविहीन हुने गिरोह सक्रिय भएपछि जिल्ला प्रहरी कार्यालय कास्कीले उपभोक्तालाई विशेष सतर्कता अपनाउन आग्रह गरेको छ ।
पछिल्लो समय अनलाइन किनमेलको बढ्दो मोहलाई अपराधीहरूले ठगीको माध्यम बनाइरहेका छन् । भौतिक रूपमा पसलमा पुगेर सामान खरिद गर्नुभन्दा घरमै बसेर मोबाइलमार्फत सामान अर्डर गर्ने प्रवृत्ति बढेसँगै ठगीमा संलग्नहरूले टिकटक, फेसबुक र इन्स्टाग्रामजस्ता सामाजिक सञ्जाललाई प्रयोग गर्ने गरेका छन् ।
जिल्ला प्रहरी कार्यालय कास्कीका सूचना अधिकारी एवं प्रहरी नायव उपरीक्षक (डीएसपी) वीरेन्द्र पासवानका अनुसार गत वर्षको तुलनामा यस वर्ष अनलाइन ठगीसम्बन्धी उजुरीको संख्या बढ्दै गएको छ ।
प्रहरीका अनुसार हालै पोखराका एक व्यक्तिले ‘सन्ध्या कलेक्सन ३५’ नामक टिकटक आइडीमार्फत सामान खरिद गर्ने क्रममा ४ लाख ४२ हजार रुपैयाँ गुमाएका छन् । ५ सय रुपैयाँको कुर्था खरिद गर्ने क्रममा ठगीमा संलग्न व्यक्तिले विभिन्न बहानामा अग्रिम भुक्तानी गर्न लगाउँदै पटक–पटक रकम पठाउन बाध्य बनाएपछि पीडितको खाताबाट ४ लाख ४२ हजार रुपैयाँ रकम निकालिएको थियो ।
घटनाको अनुसन्धानका क्रममा प्रहरीले धनगढीबाट १७ वर्षीय किशोरलाई पक्राउ गरी कानुनी प्रक्रिया अघि बढाएको छ ।
डीएसपी पासवानले व्यक्तिगत सामाजिक सञ्जाल पेज वा टिकटक आइडीबाट अस्वाभाविक रूपमा सस्तो मूल्यमा सामान बिक्री गर्ने विज्ञापनप्रति सचेत रहन आग्रह गर्नुभयो । उहाँले अनलाइनबाट सामान खरिद गर्दा सम्भव भएसम्म सामान प्राप्त भएपछि मात्रै भुक्तानी गर्ने विधि अपनाउन सुझाव दिनुभयो ।
प्रहरीले अनलाइन किनमेल गर्दा आधिकारिक रूपमा दर्ता भएका तथा विश्वासिला पोर्टलबाट मात्र सामान खरिद गर्न आग्रह गरेको छ । दर्ता नभएका अनलाइन पसलमा विश्वास नगर्ने, जथाभावी अग्रिम रकम नपठाउने र अस्वाभाविक रूपमा सस्तो अफरको प्रलोभनमा नपर्ने हो भने अनलाइन ठगीका घटना न्यूनीकरण गर्न सकिने प्रहरीको भनाइ छ।
